10, დეკემბერი 2018 20:03:00
თემას სულხან მესხიძე განაგრძობს, რომელიც პოლიტიკური პარტიებისა და ქვეყნის პრემიერ მინისტრის პოზიციებს შემოგვთავაზებს. სულხან როგორ აფასებენ რიჟვაძის განცხადებას პოლიტიკური პარტიების ლიდერები ?
პოლიტიკურ წრეებში თორნიკე რიჟვაძეს განცხადების ტონს უწუნებენ. ნაციონალური მოძრაობის წევრის შეფასებით, მმართველი გუნდის პოლიტიკურ ფიგურას თმენი ვალდებულება აქვს და მან პატივი უნდა სცეს სიტყვისა და გამოხატვის თავისუფლებას. ასმათ დიასამიძეს მიაჩნია, რომ რიჟვაძის განცხადებაში ძალადობის და შანტაჟის ქვეტექსტი იკითხებოდა.
რეგიონის პირველი პირის პოზიცია მიუღებელია „ევროპული საქართველოს“ ერთ-ერთი ლიდერისთვის. პეტრე ზამბახიძის შეფასებით, ამგვარმა განცხადებებმა შესაძლოა, ძალადობა წაახალისოს.
ოპოზიციის წარმომადგენლების შეფასებებს არ იზიარებენ მმართველ გუნდში, სადაც მიაჩნიათ, რომ თორნიკე რიჟვაძის განცხადება ჯელალ ქიქავას მისამართით მუქარის შემცველი არ ყოფილა.
საქართველოს პრემიერ მინისტრს არ სჯერა, რომ თორნიკე რიჟვაძე ოპოზიციას ემუქრება. მამუკა ბახტაძე აჭარის მთავრობის თავმჯდომარეს პასუხისმგებლიან პოლიტიკოსად მოიაზრებს და ამბობს, რომ შურისძიებაზე საუბარი არასწორი ინტერპრეტაციის შედეგია.
ცნობისთვის თორნიკე რიჟვაძემ განცხადება მას შემდეგ გააკეთა, რაც ჯელალ ქიქავამ გასულ კვირას ერთ-ერთი ტელევიზიის ეთერში მოსახლეობის რევოლუციურ განწყობაზე ისაუბრა.