ქვეყნის საკანონმდებლო ორგანოში დღეს ქვეყნის მეხუთე პრეზიდენტი მივიდა. ახლადარჩეული მეთაურის ვიზიტს კანონმდებლები არ ელოდნენ. მთავარსარდალი მედიამ ეკა ბესელიას კაბინეტში დააფიქსირა.
ქვეყნის პირველი პირის ვიზიტი საქართველოს პარლამენტში მედიისთვის და დეპუტატებისთვის მოულოდნელი აღმოჩნდა. სალომე ზურაბიშვილი კამერებმა მაშინ დააფიქსირეს, როდესაც იგი იმ კაბინეტიდან გამოვიდა, რომელიც მას დეპუტატობის დროს ეკუთვნოდა. ზურაბიშვილმა არ დააკონკრეტა რატომ მივიდა პარლამენტში. ქვეყნის მთავარსარდალი მოგვიანებით ეკა ბესელი კაბინეტში შევიდა.
სალომე ზურაბიშვილსა და ეკა ბესელიას შორის დაახლოებით ერთ საათიანი შეხვედრის შემდეგ საქართველოს პრეზიდენტი დაცვამ კომიტეტის სათათბირო ოთახის არა ცენტრალური არამედ სხვა კარიდან გაიყვანა. ჟურნალისტებს კი გზა გადაუკეტეს და ზურაბიშვილთან მიახლოების საშუალება არ მისცეს.
სალომე ზურაბიშვილმა პარლამენტი უკომენტაროდ დატოვა, თუმცა შეხვედრის დეტალებზე მოგვიანებით იურიდიული კომიტეტის თავმჯდომარემ ისაუბრა. ეკა ბესელიას თქმით, ეს იყო მეგობრული შეხვედრა, რომელზეც სხვადასხვა საკითხებზე ისაუბრეს, მათ შორის თანამშრომლობის ფორმებზე.
ინაუგურაციის მიუხედავად სალომე ზურაბიშვილს სადეპუტატო უფლებამოსილება ჯერ არ შეწყვეტია. საპროცედურო საკითხთა კომიტეტის თავმჯდომარემ ოპოზიციის განცხადებას იმის შესახებ, რომ თითქოსდა, ამით კანონი ირღვევა არასწორი უწოდა.
სალომე ზურაბიშვილის, როგორც დეპუტატის კაბინეტი საქართველოს პარლამენტში დღეს უკვე ცარიელია. პრეზიდენტმა საკუთარი ნივთებიც წაიღო. მალე მას უფლებამოსილებაც შეუწყდება. ამ გადაწყვეტილებას პარლამენტი პლენარულ სხდომაზე სავარაუდოდ, პარასკევს მიიღებს.
8
s
s
s