324 მილიონი ლარი - რეგიონის მომავალი წლის ბიუჯეტი დამტკიცებულია. მმართველმა გუნდმა მთავარ ფინანსურ დოკუმენტს მხარი დაუჭირა, ოპოზიამ კი პროტესტის ნიშნად სხდომა დატოვა.
13 ხმით ერთის წინააღმდეგ - აჭარის ბიუჯეტი დამტიცებულია. მომავალი წლის ფინანსური დოკუმენტი 2019 წლისთვის რეგიონში ბიუჯეტი 324 მილიონ ლარს გადააჭარბებს.
აჭარის უმაღლესი საბჭოს სხდომაზე მომავალი წლის ბიუჯეტის წარდგენისას ფინანსთა მინისტრმა აღნიშნა, რომ ფინანსები მოსახლეობის ინტერესების გათვალისწინებით გადანაწილდა. ჯაბა ფუტკარაძემ განაცხადა, რომ 2019 წლისთვის სამინისტრო აქცენტს კონკრეტულ ნვესტიციებზე გააკეთებს. დაიწყება ტურისტული დანიშნულების ადგილების კვლევა, შეიქმნება საინვესტიციო პროექტები და მოხდება მუნიციპალიტეტების ტურისტული ინფრაქტრუქტურის კეთილმოწყობა. დღგ ს მნიშვნელოვანი წილი მუნიციპალიტეტების ბიუჯეტებში გადაირიცხება, შესაბამისად სახელმწიფო ბიუჯეტიდან მათი დაფინანსება 10 მილიონი ლარით გაიზრდება.
„ერთიანი ნაციონალური მოძრაობის“ და „ევროპული საქართველოს“ წევრმა სხდომათა დარბაზი პროტესტის ნიშნად დატოვეს და ბიუჯეტის განხილვას არ დასწრებიან. სხდომის დაწყებამდე გია აბულაძემ აღნიშნა, რომ ოპოზიცია 2019 წლის მთავარ ფინანსურ დოკუმენტზე პასუხისმგებლობას არ იღებს. სხდომა პროტესტის ნიშნად დამოუკიდებელმა დეპუტატმა პეტრე ზამბახიძემაც დატოვა.
შენიშვნები სხდომაზე არ დაუფიქსირებია და არც ბიუჯეტისთვის დაუჭერია მხარი დემოკრატიული მოძრაობის წევრს. გიორგი ცინცქილაძემ განმარტა, რომ წლების განმავლობაში „ქართულმა ოცნებამ“ ბიუჯეტის ხალხის საჭიროებაზე მორგება ვერ შეძლო.
უმაღლესი საბჭოს თავმჯდომარემ ოპონენტების განცხადების საპასუხოდ აღნიშნა, რომ საწყენია, როცა დეპუტატი სხვადასხვა მიზეზით სხდომათა დარბაზს ტოვებს. თუმცა არჩევნებთან დაკავშირებულ კრიტიკას არ იზიარებს.
მილიონ ასი ათასი ლარით იზრდება სკოლების ინვენტარიზაციის პროგრამა. განათლების სამინისტრო 2019 წელს 8 ახალ სკოლას ააშენებს და 10- ს რეაბილიტაციას ჩაუტარებს. 15 სკოლა ახალი ინვენტარით აღიჭურვება. ჯამში სამინისტროს ბიუჯეტი 50 მილიონ ლარს აჭარბებს.
ჯანმრთელობისა და სოციალური დაცვის სამინისტროს პროგრამის ფარგლებში ღვიძლის ტრანსპლანტაციის დაფინანსება იზრდება, ასევე, ძუძუს კიბოს მეტასტაზური დაავადების მკურნალობის ხარჯები სრულად დაფინანსდება.
სოფლის მეურნეობის სამინისტრო 2019 წელს აქცენტს აგროსერვისების განვითარებაზე გააკეტებს, 10 ათას კვადრატულ მეტრ სასათბურე მეურნეობას დააფინანსებენ. იგეგმება მრავალწლოვანი მცენარეების გაშენების და მეცხოველეობის ჯიშების განახლებაზე ზრუნვაც.
მომდევნო წლიდან საგზაო და სამელიორაციო სისტემების და ტურიზმის დეპარტამენტი აჭარის ფინანსთა სამინისტროს დაქვემდებარებაში გადავა, შეიქმნება ბულვარის კონსერვაციის გეგმაც, მუნიციპალიტეტებში ტურიზმის სფეროში დასაქმებული ადამიანებისთვის ტრენინგები ჩატარდება.
დღევანდელ სხდომაზე აჭარის უმაღლესმა საბჭომ მთავრობის სტრუქტურის, უფლებამოსილებისა და საქმიანობის წესის შესახებ კანონი დაამტკიცა, რომლის ფარგლებშიც სამინისტროები სტრუქტურულ ცვლილებებს განახორციელებენ.