27, დეკემბერი 2018 20:35:00
ხმაური ცათამბჯენების მშენებლობის გარშემო. 15 ხმით ბათუმის საკრებულომ უმრავლესობამ ,,სილქროუდ ჯგუფს“ 6 ჰექტარ ტერიტორიაზე განაშენიანების რეგულირების გეგმის მომზადება დაავალა. გამოვლენ თუ არა მოქალაქეები პროექტის წინააღმდეგ და რა ეკოლოგიურ საფრთხეებზე საუბრობენ მესამე სექტორში?
ხმაური ბათუმის საკრებულოში ,,სილქ როუდ ჯგუფისთვის“ გეგმარებითი დავალების მიცემის საკითხს მოჰყვა. კომპანიამ თავად უნდა ჩაატაროს კვლევა და დადოს დასკვნა რა ტიპის შენობები აიგება ადგილზე. მოქალაქეების ნაწილისთვის გაუგებარია, რატომ არ უყენებს მერია საკუთარ პირობებს მენაშენეს?
საკითხის განხილვას სხდომაზე საზოგადოება ,,ბათომის“ წევრები და მოქალაქეები ესწრებოდნენ. ერთ-ერთმა მოქალაქემ დეპუტატებს მეტი დაფიქრებისკენ მოუწოდა და აღნიშნა, რომ თუ რივიერას ტერიტორიაზე ცათამბჯენები აშენდება, ეკოლოგიური კატასტროფაა მოსალოდნელი.
ფრაქცია ,,ქართული ოცნების“ თავმჯდომარე ნატალია ზოიძემ განაცხადა, რომ საკრებულოს წევრები საკითხზე კონკრეტულ ინფორმაციას არ ფლობენ. დეპუტატმა ზურაბ ნაკაიძემ კი აღნიშნა, რომ მისი თხოვნა იქნება, ტერიტორიაზე კორპუსები არ აშენდეს.
15 ხმით ბათუმის საკრებულოს უმრავლესობამ სილქროუდ ჯგუფს 6 ჰექტარ ტერიტორიაზე განაშნიანების რეგულირების გეგმის მომზადება დაავალა. მათ მიერ მომზადებული დასკვნა კვლავ საკრებულომ უნდა განიხილოს.