უკიდურესად გაჭირვებული მარტოხელა შუახევიდან, რომელიც ქოხში რთულ პირობებში ცხოვრობს. ხელისუფლებისგან მივიწყებული ვახტანგ ბერიძე მეზობლების იმედადაა. სახელმწიფომ უკიდურესად გაჭირვებულს სოციალური დახმარებაც მოუხსნა.
24 წლის მარტოხელა კაცს რთულ ვითარებაში უწევს არსებობა. საცხოვრებელი ფართობი, რომელიც 7-8 კვადრატს აღემატება დაახლოებით ერთი წლის წინ მოაწყო. შენობაში საწოლი და მაგიდა დგას, კარადის ფუნქციას აქ კედლებს შორის გაბმული თოკი ითავსებს, სადაც ტანსაცმელია გადაკიდული. საცხოვრისის სახურავი დაზიანებულია, საიდანაც გაწვიმებისას ოთახში წყალი ჩადის. მარტოხელა კაცი სასმელ წყალსაც მეზობლიდან ეზიდება.
მარტოხელა ამ შენობაში ღამეს ძირითადად თბილ ამინდებში ათევს, სიცივეში კი ნათესავებს ეხიზნება, რამდენიმე წელი მეჩეთში ცხოვრობდა. 11 წელია, რაც მარტო ცხოვრობს, მამა ბავშვობაში გარდაეცვალა, მას შემდეგ ჯანმრთლობის პრობლემის მქონე დედა ძმამ თავისთან წაიყვანა, ვახტანგს კი ნათესავები ზრდიდნენ. გვიყვება, რომ რთული ბავშვობა ჰქონდა, ნათესავებსა თუ მეჩეთში გატარებული წლების შემდეგ გადაწყვიტა საკუთარი საცხოვრებელი მოეწყო, რადგანაც სახლი, სადაც წლების წინ მშობლებთან ერთად ცხოვრობდა დიდი ხნის წინ დაინგრა.
რთულ ვითარებაში მცხოვრებ მარტოხელა კაცს ახლა არც საარსებო შემწეობა აქვს და არც სხვა რაიმე სახის შემოსავალი. რამდენიმე თვე იმუშავა, რაც სოციალური დახმარების შეწყვეტის მიზეზი გახდა.
შუახევის მუნიციპალიტეტის მერიის, ჯანდაცვის სამსახურის უფროსი ამბობს, რომ ამ საკითხზე გასულ წელს იმსჯელეს, მარტოხელას დახმარება კი მხოლოდ იმის გამო ვერ შეძლეს, რომ საჭირო დოკუმენტები ბერიძემ ვერ წარმოადგინა.
რა გახდა რთულ ვითარებაში მცხოვრები მარტოხელა კაცისთვის, საარსებო შემწეობის შეწყვეტის რეალური მიზეზი და რამდენია ოჯახის სარეიტინგო ქულა, ამის გარკვევა სოციალური მომსახურების სააგენტოს, შუახევის სამსახურში ვცადეთ, თუმცა აქ აღნიშნულთან დაკავშირებით არანაირი ინფორმაცია არ მოგვაწოდეს.
რამდენ ხანს მოუწევს სხვისი დახმარების იმედად არსებობა მარტოხელა კაცს, აჭარის მთის შორეულ სოფელში, ეს ადგილობრივი თვითმართველობის მუშაობაზეა დამოკიდებული, მანამდე კი მისთვის საკუთარი საცხოვრებელი სახლის კარები ისევ, ნათესავებისგან სამოწყალოდ გაცემული ძელებით მოწყობილ შენობაში გაიღება.
1
s
s
s