16, იანვარი 2019 20:05:00
პრობლემები, რომლებიც ქალაქში უამინდობის შედეგად შეიქმნა. ბათუმში ძლიერი ქარის დროს რამდენიმე მოქალაქე დაშავდა , დაზიანდა ავტომობილები. გახარიას უწყებამ ფაქტების მოკვლევა დაიწყო. ბათუმის მერიის სამსახურები კი მთელი დღის განმავლობაში საგანგენბო რეჟიმში მუშაობდნენ.
დაზიანებული ინფრასტრუქტურა, მოგლეჯილი ხეები, წაქცეული მოსაცდელები, გადახდილი სახურავები და დაშავებული მოქალაქეები - ეს იმ შედეგების მცირე ჩამონათვალია, რომელიც ბათუმში, ძლიერმა ქარმა გამოიწვია.
2 ადამიანი დაშავდა ხახულის ქუჩაზე, რომლებიც სახლის სახურავზე სამუშაოებს ასრულებდნენ, რა დროსაც დაახლოები 3 მეტრის სიმაღლიდან გადმოვარდნენ. მედიკოსების თქმით, პაციენტების სიცოცხლეს საფრთხე არ ემუქრება.
უამინდობის დროს საგანგებო და გადაუდებელი სიტუაციების მართვის სამსახურში სულ 40 შეტყობინება შევიდა. მათგან უმეტესი ნაწილი საცხოვრებელი სახლების სახურავების დაზიანების ფაქტები იყო. შავშეთის ქუჩაზე უსაფრთხოების მიზნით რამდენიმე საათის განმავლობაში სატრანსპორტო მიმოსვლაც შეიზღუდა. ტერიტორიიდან კი მოქალაქეები გაიყვანეს.
როგორც აღმოჩნდა განსაკუთრებულ საფრთხეს ქარის დროს მშენებარე კორპუსები წარმოადგენენ, საიდანაც სამშენებლო მასალების გადმოვარდნის დროს სახლები და მანქანები დაზიანდა.
იმ კომპანიის წარმომადგენელი, რომლის ობიექტიდანაც სამშენებლო მასალები ჩამოვარდა ამბობს, რომ დაზარალებულებს ზიანს აუნაზღაურებს. „შენი სახლის“ დირექტორის თქმით, სასამართლო დავების შედეგად ამ ეტაპზე მშენებლობის პროცესი შეჩერებულია, რის გამოც უსაფრთხოების ნორმების დაცვა უჭირთ.
ბათუმის მერია სტიქიის შედეგებს უკვე სწავლობს. 20-მდე განცხადებას მუდმივმოქმედი კომისია შეისწავლის რის შემდეგაც გადაწყდება რა სახის დახმარებას გაუწევენ დაზარალებულებს.
ბათუმის მერი დღეს, ქალაქის რამდენიმე ქუჩაზე იმყოფებოდა, რომელმაც შემთხვევები ადგილზე შეისწავლა. ლაშა კომახიძე მოქალაქეებს ურჩევს უამინდობის დროს მშენებარე კორპუსებთან სიახლოვეს მოერიდონ.
უამინდობის შედეგად მოქალაქეების დაშავების და ავტომობილების დაზიანების ფაქტებზე გამოძიება უკვე დაიწყო.