24, იანვარი 2019 20:02:00
25 წელი მოქალაქეების სამსახურში. მლესავი მოხუცი, რომელიც უძველეს პროფესიას დღემდე ერთგულად ემსახურება. როგორია ასლან ჯაფარიძის ყოველდღიურობა და ოსტატის სურვილები?
სახელდახელოდ მოწყობილი ეს ლურჯი დახლი წერეთლის პირველ ნომერში, 25 წელია დგას. მისი 73 წლის მფლობელი ასლან ჯაფარიძეა. ხანდაზმული აქ ყოველ დილით 9 საათზე მოდის. ლესავს ხერხებს, დანებს, მაკრატლებს, ხორცსაკეპი მანქანების ნაწილებს, ხანჯლებს. მიუხედავად იმისა, რომ ოჯახი წინააღმდეგია, ხელსაქმეს თავს არ ანებებს. ფიქრობს, რომ ბათუმელ ხალხს სჭირდება.
თბილისის მოედანზე, განთავსებული დახლი და სალესი ხელსაწყოები წლების მანძილზე მისი ერთადერთი შემოსავალია. ყველაფერი 25 წლის წინ დაიწყო. მუშაობა მძიმე სოციალურმა ფონმა გადააწყვეტინა. თამბაქოს გაყიდვით მიღებული შემოსავალი რომ საკმარისი არ აღმოჩნდა, ხელსაქმე ერთ-ერთი მლესავისგან ისწავლა. შეგირდს მასწავლებელმა პატარა სამჭედლო მაგიდაც უსახსოვრა. ნივთს დღემდე საგულდაგულოდ უფრთხილდება.
ზამთარში ღია ცის ქვეშ მუშაობს. უჭირს, თუმცა სხვა გზა არ აქვს.
სამუშაო პროცესში წლების განმავლობაში მიღებული იარები ასლანს ხელზე ეტყობა. ამბობს, რომ ბასრ ნივთებთან მუშაობისას განსაკუთრებული სიფრთხილეა საჭირო. ფიქრობს, რომ პროფესია დეფიციტურია და შიშობს, რომ მალე მისი შესწავლის მსურველები აღარ იქნებიან.
ასლან ჯაფარიძე ერთ-ერთი ყველაზე ძველი პროფესიის ოსტატია. მისი ყველაზე დიდი სურვილი ცოდნის მომავალი თაობებისთვის გაზიარებაა.