05, თებერვალი 2019 20:03:00
გაუსაძლისი სუნი ტურისტულ ზონაში. ადლიის დასახლებაში მცხოვრებლები 20 წელზე მეტია პრობლემის მოგვარებას ითხოვენ. ადგილობრივებს შემოსავლის წყაროს დაკარგვის შიში აქვთ, რადგან ამტკიცებენ, რომ ქალაქის სტუმრები დასახლებაში დასვებაზე უარს ამბობენ.
ეს ახალი ბულვარის ტერიტორიაა. ქუჩა ზღვასთან ახლოს მდებარეობს. მიუხედავად ამისა, დასახლებაში უსიამოვნო სუნი დგას. თან იმდენად მძაფრი, რომ ადგილობრივები ფანჯრების გაღებასაც ერიდებიან. მოქალაქეები პრობლემის არსებობას წყალარინების გამწმენდ ნაგებობას უკავშირებენ.
გაუსაძლისი სუნი აქ მცხოვრებლებს დაახლოებით 20 წელია აწუხებთ. პრობლემის მოგვარების მიზნით არაერთი აქცია გამართეს, თუმცა საკითხის გადაჭრით ქალაქის მერია, როგორც აქ შეკრებილები ყვებიან, არასდროს დაინტერესებულა.
პრობლემის გამო, როგორც ადლიაში მცხოვრებლები ყვებიან, შემოსავლის წყარო დაკარგეს. ირწმუნებიან, რომ ანტისანიტარიის გამო ტურისტულ სეზონზე სტუმრები აქ ბინის ქირაობას ერიდებიან
ადლიის გამწმენდი ნაგებობის მშენებლობა 2010 წელს დაიწყო და ექსპლუატაციაში 2012 წლის ზაფხულში შევიდა. მას შემდეგ ობიექტს „ბათუმის წყალი“ მართავს. ორგანიზაციაში მოქალაქეების ბრალდებას არ იზიარებენ და სუნის მიზეზად ადლიის ნაგავსაყრელს ასახელებენ.
შპს „სანდასუფთავებაში“ განმარტეს, რომ მათ ტერიტორიიდან მხოლოდ ნარჩენების გატანა ევალებათ, ადლიის ნაგავსაყრელის მართვა და ნარჩენების გადამუშავება კი კომპანია „სევერის“ ვალდებულებაა. ამ უკანასკნელში სატელევიზიო კომენტარი არ გააკეთეს, მხოლოდ სიტყვიერად განმარტეს, რომ ბრალდება უსაფუძვლოა და სუნს წყალარინების გამწმენდი ნაგებობა იწვევს. განიხილავს თუ არა ბათუმის მერი კომპანიების ურთიერთბრალდებებს და რომელმა მათგანმა უნდა აგოს პასუხი ადლიის დასახლებაში არსებულ პრობლემაზე? ჩვენი მცდელობის მიუხედავად საკითხი გაურკვეველი დარჩა, რადგან უწყების ხელმძღვანელმა პირებმა თემაზე საუბარი არ ისურვეს.