ყოფილი თანამშრომელი დირექტორის წინააღმდეგ. ნოდარ ბედინაძე ამტკიცებს, სანდასუფთავების სამსახურიდან იმიტომ გაუშვეს, რომ ხელმძღვანელის კორუფციულ გარიგებებში ჩართულობაზე ინფორმაციას ფლობდა. რა პასუხი გასცა ბრალდებას ადრესატმა?
ნოდარ ბედინაძე სამსახურიდან 24 იანვარს, დაკისრებული მოვალეობის შეუსრულებლობისთვის, ასევე, დირექტორის დავალებების იგნორირებისთვის და კორპორატიული სუბორდინაციის დარღვევის მოტივით გაათავისუფლეს. ბედინაძის ინტერესების დამცველი ირწმუნება, რომ დირექტორმა იგი მას შემდეგ გაათავისუფლა, როდესაც დასაქმებულმა ბათუმის მერს და აჭარის მთავრობის თავჯდომარეს წერილობით მიმართა. ადვოკატის მტკიცებით, სანდასუფთავების დირექტორი კორუფციულ გარიგებებში ფიგურირებს.
უხარისხო და არასაკმარისი ცოცხები ერთ-ერთი პრობლემაა, რაზეც „სანდასუფთავებიდან“ გათავისუფლებული თანამშრომელი საუბრობს. ბედინაძის ინტერესების დამცველი ირწმუნება, რომ ორგანიზაცია 2 800 ცოცხს ხარჯავს, თუმცა დოკუმენტურად 11 000 ერთეული ფორმდება. მას შემდეგ, რაც ბედინაძემ მსგავსი ინფორმაციები მოიპოვა დირექტორმა მისი შევიწროვება დაიწყო. ეს ყველაფერი კი იმაში გამოიხატებოდა, რომ მისთვის სამსახურეობრივად განკუთვნილ 100 ლიტრ საწვავს დირექტორი აღარ აძლევდა.
წერილი, რომელიც დასაქმებულმა რეგიონის პირველ პირს მიწერა ასევე მობილური ტელეფონის შეძენი ფაქტზეცაა საუბარი. ადვოკატის თქმით, სანდასუფთავების დირექტორმა დავით დუმბაძემ 1800 ლარიანი მობილური ორგანიზაციის ბიუჯეტიდან შეიძინა.
ორგანიზაციამ სატრანსპორტო საშუალებების რემონტისთვის 60 000 ლარიანი ტენდერი გამოაცხადა, სრულად ათვისებული თანხის მიუხედავად ნოდარ ბედინაძის მტკიცებით, ავტომობილების მხოლოდ 20 % გარემონტდა.
ბრალდებებს კატეგოიულად უარყოფს ადრესატი. დავით დუმბაძე ირწმუნება, რომ ყოფილი თანამშრომელი 4 დეკემბერს, მიცემული დავალების შემდეგ არ უნახავს. ირწმუნება, რომ ნოდარ ბედინაძე არც მის ზარებს პასუხობდა.
რაც შეეხება ავტომობილების რემონტის ხარჯებს - დავით დუმბაძე ამბობს, რომ ტენდერი იმ დროს გამოცხადდა, როდესაც იგი სანდასუფთავების სამსახურში არ მუშაობდა. შესაბამისად ამ ნაწილში ყოფილი თანამშრომლის ბრალდებას არ იზიარებს.
სანდასუფთავების ყოფილი თანამშრომლის პრეტენზიებს კარგად იცნობს ლაშა კომახიძე. ბათუმის მერი ახლა ძალოვანი უწყების გამოძიების შედეგებს ელოდება.
ნოდარ ბედინაძე ბათუმის მერიის „სანდასუფთავების სამსახურის“ მობილური ჯგუფის კოორდინატორად 4 წელი მუშაობდა. სამსახურიდან გათავისუფლებული ხვალ, ბათუმის საქალაქო სასამართლოს საჩივრით მიმართავს.
18
s
s
s