21, თებერვალი 2019 20:04:00
მამუკა ხაზარაძე თიბისი ბანკს ტოვებს. განცხადება მან სოციალური ქსელით გაავრცელა . ნება თუ ზეწოლა?
ზეწოლით თუ საკუთარი ნებით - მამუკა ხაზარაძე თიბისი ბანკს ტოვებს. სამეთვალყურეო საბჭოს თავმჯდომარემ ამის შესახებ დღეს დილით ფეისბუქზე დაწერა. ამბობს, რომ პროკურატურის მიერ ფულის გათეთრებაში დადანაშაულების მიზანი მისი დისკრედიტაციაა. საკმაოდ ხმაურიან განცხადებაში ხაზარაძემ კიდევ ერთხელ აღნიშნა, რომ თიბისი ბანკის ჯგუფზე შეტევა მიმდინარეობს.
ხაზარაძესთან ერთად, თიბისი ბანკის სამეთვალყურეო საბჭოს ტოვებს მისი მოადგილეც ბადრი ჯაფარიძეც. თუმცა ისინი ინარჩუნებენ TBC ჯგუფის ბრიტანული ჰოლდინგის დირექტორთა საბჭოს თავმჯდომარისა და მოადგილის პოზიციებს. ხაზარაძის მსგავსად ჯაფარიძეც მზად არის სამართლებრივი დავა განაგრძოს და მონაწილეობა მიიღოს პარლამენტის მიერ დგეგმილ განხილვაში.
თავად თიბისი ბანკის განცხადებაში კი, რომელიც ეროვნული ბანკის საიტზე გამოქვეყნდა ნათქვამია, რომ თიბისი წყვეტს სასამართლო დავებს ეროვნული ბანკის წინააღმდეგ და გადაიხდის მათ მიერ ჯარიმის სახით დაკისრებულ 1 მილიონ ლარს.
თიბისი ბანკის გადაწყვეტილებას მიესლმება ეროვნული ბანკი, რომელიც მიიჩნევს, რომ მამუკა ხაზარაძის და ბადრი ჯაფარიძის სამეთვალყურეო საბჭოდან წასვლა პოზიტიურ გვლენას იქონიებს, როგორც ბანკის ისე ქვეყნის საფინანსო სექტორის განვითარებაზე. სები მოუწოდებს ყველას თავი შეიკავონ სპეკულაციებისგან, ვინაიდან თიბისი ბანკთან დაკავშირებით ორივე მხრიდან კონკრეტული საკითხი ამოწურულია.