მეწარმე, რომელიც სამტრედიაში საბავშვო ბაღებს ცხენის ხორცით ამარაგებდა, სამართადამცველებმა აიყვანეს. აქვს თუ არა კავშირები შპს ელენიკოს ხელმძღვანელს იმ კომპანიასთან,რომელსაც ხორცპროდუქტები ბათუმის სკოლამდელი აღზრდის დაწესებულებებში შემოაქვს?
ეს კადრები რამდენიმე დღის წინ ბათუმში გორგილაძის ქუჩაზეა გადაღებული. მეწარმე მომხმარებლის მოტყუების, ყალბი დოკუმენტების დამზადება-გამოყენების ბრალდებით დააკავეს. საგამოძიებო ორგანოს ცნობით, ე.წ ფორმა 2ის გაყალბების მეშვეობით ტენდერში გამარჯვებულ კომპანიას სამტრედიის საბავშვო ბაღებში საქონლის ხორცთან ერთად ცხენის ხორცი შეჰქონდა.
ბრალდებულის ინტერესებს ორი ადვოკატი იცავს. ისინი ჩვენთან სატელეფონო საუბარში განმარტავენ, რომ დაკავებულთან კომუნიკაცია ჯერჯერობით არ ჰქონიათ. საქმის მასალებს უფლებადამცველები არ იცნობენ, შესაბამისად წინასწარი დასკვნების გაკეთება უჭირთ.
შპს „ელენიკოს“ ხელმძღვანელი ბათუმის ერთ-ერთ გარეუბანში ცხოვრობს. „მაცნეს“ დღეს, ბრალდებულის სახლი დაკეტილი დახვდა. მეზობლები მომხდარის შესახებ ინფორმაციას არ ფლობდნენ, შესაბამისად კომენტარის გაკეთება არ ისურვეს.
ოპოზიცია ეჭვობს, რომ აღნიშნული მეწარმე ხორცით ბათუმის სკოლამდელი აღზრდის დაწესებულებებსაც ამარაგებდა. „ნაციონალური მოძრაობის“ წევრის მტკიცებით, პირი, რომელიც სამტრედიის საბავშო ბაღებს საქონლის ხორცით აწვდიდა, კავშირი აქვს იმ კომპანიებთან, რომლებიც აჭარაში, რამდენიმე საბავშო ბაღებსაც აწვდის ხორცს.
ოპოზიციის ბრალდებას კატეგორიულად უარყოფენ ბათუმის საბავშვო ბაღების გაერთიანებაში. დირექტორის მტკიცებით, დაწესებულებებში ხორც-პროდუქტების შეტანა მკაცრად კონტროლდება, ამასთან მამუკა შამილიშვილის თქმით, ლაბორატორიული კვლევებიც ტარდება.
სურსათის ეროვნული სააგენტოს ცნობით, გასულ წელს საბავშვო ბაღებში განხორციელებული სახელმწიფო კონტროლის შედეგად, 125 ადმინისტრაციული სამართალდარღვევა გამოვლინდა, აქედან ცხენის ხორცის აღმოჩენის 4 შემთხვევა დაფიქსირდა.
11
s
s
s