12, მარტი 2019 20:02:00
ატერორებს თუ არა ბიზნესს აჭარის მთავრობის თავმჯდომარე და ბათუმის მერი? კონკრეტული ფაქტებით ერთ-ერთი დეველოპერი ალაპარაკდა. რა ბრალდებები ჰქონდა დღეს რიჟვაძის და კომახიძის მიმართ ბიზნესმენ ლევან კანთელაძეს და რა თქვეს ადრესატებმა?
ბიზნესმენი ლევან კანთელაძე პირველია, ვინც აჭარაში სფეროს ტერორზე ხმამაღლა ალაპარაკდა. კომპანია ,,დექსტერ დეველოპმენტის“ დირექტორი ირწმუნება, რომ ორგანიზაციაზე მიზანმიმართული ზეწოლა ხორციელდება. კანთელაძე პროცესებში უშუალოდ ბათუმის მერის და აჭარის მთავრობის თავმჯდომარის ინტერესებს ხედავს.
დეველოპერს, ეგნატე ნინოშვილის ქუჩაზე, 18 სართულიანი სახლის მშენებლობა სურდა. შენობის სიმაღლის კოეფიციენტზე ნებართვა 2016 წელს მიიღო, თუმცა სამშენებლო პროცესი ამ დრომდე ვერ დაიწყო. ბიზნესმენის მტკიცებით, ალტერნატიული მიწის ნაკვეთი ბაგრატიონისა და აბუსერიძის ქუჩების მონაკვეთში შესთავაზეს, თუმცა მოგვინებით, აღნიშნულ ადგილზეც უარი უთხრეს.
კანთელაძე იმასაც ამბობს, რომ თვითთმმართელობა გადაწყვეტილებებს დამოუკიდელად ვერ იღებს და მერის საქმიანობაში თორნიკე რიჟვაძე ერევა.
სამოქალაქო აქტივისტი ირწმუნება, რომ კანთელაძე არ არის ერთადერთი ბიზნესმენი, ვინც ხელისუფლებისგან ზეწოლას განიცდის. ბაჩუკი ჩხეიძე პროცესში, კერძო ინტერესებს ხედავს და მიიჩნევს, რომ ხელისუფილებას ამით ბიზნესის მართვის სურვილი აქვს.
კონკრეტულ პროექტთან დაკავშირებით დეტალური ინფორმაცია არ აქვს ბიზნესომბუდსმენს. მიუხედავად ამისა, ტარიელ გიორგაძე ამბობს, რომ საჭიროების შემთხვევაში კომპანიას ხელისუფლებასთან უშუამდგომლებს.
ბრალდებას უარყოფს ბათუმის მერი. ლაშა კომახიძე აცხადებს, რომ თვითმართველობა და მთავრობა არა თუ აზარალებს ბიზნესს, არამედ, პირიქით, მათთან დიალოგის რეჟიმშია.
უნდა ველოდოთ თუ არა ზეწოლაზე სხვა ბიზნესმენების მხრიდიან განცხადებების გაკეთებას, ამ ეტაპზე უცნობია.
აჭარის მთავრობაში ბრალდებაზე საპასუხო კომენტარი არ გაკეთდა.