26, მარტი 2019 20:02:00
მოქალაქე, რომელიც მიწის დაკანონებას წლებია ითხოვს. მემკვიდრეობით მიღებული ქონება, რომლის დარეგისტრირებას შოთა ჩიქოვანი ამ დრომდე ვერ ახერხებს. რატომ გახდა მიწის ნაკვეთი დავის მიზეზი ? პრეტენზიით ხანდაზმულმა დღეს ქვეყმნის პრემიერს მიმართა.
გონიოში მცხოვრები შოთა ჩიქოვანი იმ მიწის ნაკვეთზე საუბრობს, რომელიც მისივე მტკიცებით, ოჯახის საკუთრებაა. დაახლოებით 2 ჰექტარი მიწის ფართობი ბაბუის მფლობელობაში იყო. თუმცა აქედან 1ჰექტარი 1934 წელს სახელმწიფომ ჩამოართვა. მოგვიანებით, შოთა ჩიქოვანის დედას ქმარმა 7 500 კვადრატული მეტრი გაუფორმა.
აღნიშნული 7 500 კვადრატული მეტრი ფართობი დედისგან მემკვიდრეობით შოთა ჩიქოვანს დარჩა. თუმცა მიწის დაკანონება დედის გარდაცვალებამდე ვერ მოახერხა. მისივე მტკიცებით, პრობლემა 1986 წელს მიწის რეფორმის შეცვლამ კიდევ უფრო გაართულა. ირწმუნება, რომ 4 300 კვადრატრული მეტრი მას კანონიერად ეკუთვნის, რის უფლებასაც წლებია უშედეგოდ ითხოვს.
შოთა ჩიქოვანს ეჭვია აქვს, რომ ბათუმის მერიის მიწის აღიარების კომისია და საჯარო რეესტრი მიწის დასკანონებაში ხელს მიზანმიმართულად უშლიან.
ბათუმის მერიის მიწის აღიარების კომისიაში კომენტარი არ გაკეთდა. საჯარო რეესტრში ჩიქოვანის პრობლემის შესახებ ინფორმაცია არ ჰქონდათ. აქ გვითხრეს, რომ განცხადების ნომერით სხვა მოქალაქის ინფორმაცია იძებნება. ჩიქოვანი კი ირწმუნება, რომ მიწის რეგისტრაციის მოთხოვნით თითქმის ყველა უწყებას წერილობით მიმართა, თუმცა ყურადღებას არავინ აქცევს, მათ შორის პრემიერ-მინისტრის და პრეზიდენტის ადმინისტრაცია. მოქალაქემ საკუთარი ინტერესების დაცვის მიზნით, სარჩელი სასამართლოშიც შეიტანა.