TV 4-მა მაუწყებლობა შეწყვიტა. ტელე რადიო -კომპანია აუდიტორიას პროტესტის ნიშნად გუშინ დაემშვიდობა, თუმცა კონკრეტული დეტალები და მიზეზები არ გახმოვანებულა. მაყურებლისთვის მხოლოდ ის გახდა ცნობილი, რომ საქმეში რუსთავის მერის სახელი ფიგურირებს.
წამყვანის საგანგებო მიმართვის შემდეგ მაუწყებლის სიგნალი გაითიშა. ვიდრე არხის სახე მაყურებელს დაემშვიდობებოდა მენეჯმენტის წერილობითი პოზიცია აუდიტორიას ამცნო. განცხადებაში კონკრეტული არაფერია ნათქვამი, თუმცა მასში რუსთავის მერის სახელი ფიგურირებს. წამყვანმა პირდაპირ ეთერში ისიც აღნიშნა, რომ სწორედ ირაკლი ტაბაღუას მერობის პერიოდში დაფიქსირდა მაუწყებლობის შეჩერების ფაქტი.
ვინ ცდილობს ქალაქი ტელევიზიისა და რადიოს გარეშე დატოვოს? ამ კითხვაზე პასუხს ითხოვს მედიასაშუალების ხელმძღვანელობა. თუმცა დამატებითი დეტალებზე მენეჯმენტს საჯაროდ საუბარი არ სურს. არხის პროტესტი დაახლოებით ერთ კვირიანი იქნება, რის შემდეგაც მაუწყებლობა განახლდება.
რუსთავის მერისთვის გაუგებარია სამაუწყებლო კომპანიის ბრალდებები. ირაკლი ტაბაღუა პროცესში მის მონაწილეობას კატეგორიულად გამორიცხავს. ირწმუნება, რომ ქალაქის თვითმართველობას რედაქციის საქმიანობაში ჩარევის მცდელობა არასდროს ჰქონია. იგი მედიასაშუალებას პრობლემების შესახებ საჯაროდ საუბარს ურჩევს.
სამაუწყებლო კომპანიის პოზიცია გაუგებარია მედია ექსპერტისთვისაც. ნათია კუპრაშვილს მიაჩნია, რომ პროცესი უფრო გამჭვირვალე უნდა იყოს, რადგან არხის საგანგებო განცხადების შემდეგ ბევრი კითხვა გაჩნდა.
TV 4 - რუსთავში და მის მუნიციპალიტეტებში 1998 წელიდან მაუწყებლობს. კომპანიაში დაახლოებით 35 ადამიანია დასაქმებული. არხის დირექტორმა გიგი მგალობლიშვილმა თემაზე კომენტარის გაკეთება არ ისურვა.
11
s
s
s