დღეიდან ნარკოტიკულ თრობაზე მძღოლების შემოწმება დაიწყო. მონიტორინგს პატრულ ინსპექტორები ახორციელებენ. გახარიას უწყებამ თანამშრომლები ამ მიმართულებით უკვე გადაამზადა. რა დაგიჯდებათ კანონდარღვევა?
მძღოლებს საპატრულო პოლიციის თანამშრომლები პორტატული გერმანული ნარკოტესტერებით შეამოწმებენ. აღჭურვილობა დაადგენს, მიიღო თუ არა მძღოლმა რომელიმე ნარკოტიკული საშუალება ბოლო 8 საათის მანძილზე. იმ შემთხვევაში, თუ აპარატი ორგანიზმში ნარკოტიკული ნივთიერების არსებობას დაადგენს, მოქალაქე სისხლის სამართლის წესით დაისჯება. ეს ან ფულადი ჯარიმა იქნება, ან თავისუფლების ერთ წლამდე ვადით აღკვეთა. შესაძლოა სატრანსპორტო საშუალების მართვის უფლება მძღოლს 3 წლით ჩამოერთვას.
ნარკოტესტის შემოწმებაზე საპატრულო პოლიციის დეპარტამენტის თანამშრომლებმა გადამზადება უკვე გაიარეს. პატრულ-ინსპექტორები კურსს 10 დღის განმავლობაში გადიოდნენ. გახარიას უწყებაში ამბობენ, რომ სიახლის მიზანი საგზაო მოძრაობის მონაწილეთა სიცოცხლისა და ჯანმრთელობის დაცვაა.
სიახლეს მიესალმებიან მძღოლებიც. ამბობენ, რომ ნარკოტიკული ზემოქმედების ქვეშ მყოფი მძღოლები ავარიულ სიტუაცის ქმნიან.
კანონის ამოქმედებას დადებითად აფასებენ მესამე სექტორშიც. „საქართველოს ალიანსი უსაფრთხო გზებისთვის“ თავმჯდომარეს მიაჩნია, რომ სიახლე ავტოსატრანსპორტო შემთხვევების რიცხვს შეამცირებს.
ნარკოტიკული თრობის ქვეშ მყოფი მძღოლების სისხლის სამართლის წესით დასჯის პრაქტიკა ევროპის არაერთ ქვეყანაში მოქმედებს, მათ შორის საფრანგეთში, გერმანიაში, ჰოლანდიაში, იტალიაში, პოლონეთში, ფინეთში, შვედეთში . საქართველოში გერმანიიდან სულ 10 ათასი ნარკოტესტი შემოიტანეს.
17
s
s
s