04, აპრილი 2019 20:02:00
ეზრდება თუ უმცირდება რეგიონის წარმომადგენლობით ორგანოს უფლებამოსილება? სხდომა , რომელზეც ახალი რეგლამენტი დამტკიცდა, ხმაურის ფონზე მიმდინარეობდა. დეპუტატების დაპირისპირების მიზეზი დოკუმენტი გახდა. ოპოზიცია ამტკიცებს, რომ რგოლი მაკონტროლებლის ფუნქციას კარგავს. რას ამბობენ მმართველ გუნდში?
სხდომა აჭარის უმაღლეს საბჭოში ხმაურით დაიწყო. დღის წესრიგით გათვალისწინებული საკითხების განხილვამდე ოპოზიციამ ხელისუფლება ტელევიზიაზე ზეწოლაში დაადანაშაულა. ელგუჯა ბაგრატიონის განცხადებით, აჭარის საზოგადოებრივი მაუწყებლის სარედაქციო პოლიტიკის გაკრიტიკება იმ ჯგუფის მიერ, რომელიც „ქართულ ოცნებას“ უჭერს მხარს არის მედიის სარედაქციო პოლიტიკაზე გავლენის მოხდენის მცდელობა.
ახალ რეგლამენტს, რომელსაც დღეს რეგიონის წარმომადგენლობით ორგანოში განიხილავდნენ პროტესტის ნიშნად „ნაციონალური მოძრაობის“ წევრები არ ესწრებოდნენ. ოპოზიციაში ამბობენ, რომ განახლებული რეგლამენტით ფრაქციის კომპეტენციები შემცირდება, ასევე, შეეზღუდებათ მთავრობის თავმჯდომარისა და მინისტრთა კაბინეტის დაბარების უფლებაც. განცხადებები არასერიოზულად მიაჩნია უმაღლესი საბჭოს თავმჯდომარეს. დავით გაბაიძის თქმით, ამ ცვლილებებით გაიზრდება წარმომადგენლობით ორგანოს როგორც მაკონტროლებელის როლი.
რეგლამენტში ცვლილებების შეტანა საკონსტიტუციო რეფორმის შემდეგ გახდა საჭირო. საკანონმდებლო პაკეტი, რომელიც დღეს დამტკიცდა რეგლამენტთან ერთად, კიდევ რამდენიმე სამართლებრივ აქტს მოიცავს. მათ შორის დაიხვეწა და დაზუსტდა სადებუტატო კითხვის ფორმირება. შეიცვალა ვეტოს დაძლევის მექნაიზმიც.
უმაღლეს საბჭოში დღის წესრიგით გათვალისწინებული 4 საკითხი განიხილეს.
ბრალდებას კატეგორიულად უარყოფენ მმართველ გუნდში. ცოტნე ანანიძის თქმით, ხელისუფლების დაკავშირება სამოქალაქო ჯგუფების პოზიციებთან არასწორია.