სამშაბათი 20, აგვისტო 2019

34 სახლი ბათუმში, სადაც ადამიანებს ცხოვრება რისკის ფასად უწევთ

18, აპრილი 2019 20:03:00

ავარიული სახლები, რომლებშიც  მოქალაქეები  ბზარებში  ცხოვრობენ.  ქალაქში   ამ ეტაპზე საფრთხის  შემცველი 34  ნაგებობაა.  ციფრები   სამხარაულის ექსპერტიზის ბიურომ  დადო  და რეკომენდაციებიც  გასცა, თუმცა  ბათუმის მერიას მათი  გათვალისწინება  ჯერ  არ დაუწყია.  

ნოდარ ზოიძეს ცხოვრება უკვე წლებია საფრთხის ქვეშ უწევს. საცხოვრებელს ბზარი პირველად 7 წლის წინ გაუჩნდა, თუმცა ნაპრალბის გაღრმავება როგორც თვითონ ამბობს, მიმდებარე ტერიტორიაზე მაღლივი კორპუსების მშენებლობამ კიდევ უფრო დააჩქარა. 

გენერალ ასლან აბაშიძის 7 ნომერში მდებარე ავარიული სახლი ერთ-ერთია იმ საფრთხის შემცველი 34 ნაგებობიდან, რომელზეც გადაწყვეტილებას მალე საკრებულო მიიღებს. ბათუმის მერიამ წარმომადგენლობით ორგანოს წერილობით მიმართა. ნაგებობები სამხარაულის ექსპერტიზის ბიურომ შეისწავლა, რის მიხედვითაც მიშენების დროული დემონტაჟი უნდა განხორციელდეს. გადაწყვეტილებას არ ეთანხმება დონარ დედოფალიძე. სურვილი აქვს, რომ კორპუსი გამაგრდეს, დემონტაჟის შემთხვევაში კი თანხები რაც მიშენებაზე დახარჯა  აუნაზღაურონ. 

ჯავახიშვილის ქუჩის, 78-ში ავარიული კორპუსის მიშენებული ნაწილების დეფორმირების პროცესი გრძელდება, რაც საფრთხეს უქმნის ადამიანთა სიცოცხლეს. მერიის ინფორმაციით, აუცილებელია  შეიზღუდოს მიშენებული ნაწილების ექსპლუატაცია. აქ მცხოვრებლებიც მიშენების დემონტაჟის შემთხვევაში თანხის ანაზრაურებას მოითხოვენ.

გაურკვეველია ტბელ აბუსერიძის ქ. #29ა-ში არსებული ავარიულ სახლის სამომავლო ბედიც. ამ შემთხვევაშიც ანალოგიური მდგომარეობაა. საფრთხის შემცველ შენობაში მცხოვრებლები დახმარებას წლებია უშედეგოდ ითხოვენ.

ბათუმის მერის თქმით, გადაწყვეტილება ჯერ მიღებული არ არის და პრობლემას სწავლობენ. ლაშა კომახიძის ინფორმაციით, ავარიული საცხოვრებელის დათმობის შემთხვევაში მესაკუთრეებს შესაძლოა, კონპენსაცია გადაუხადონ.

ლევან სამხარაულის სასამართლო ექსპერტიზის ეროვნულმა ბიურომ ბათუმში, მდებარე 34 ავარიული საცხოვრებელის საინჟინრო ექსპერტიზის დასკვნა, საქალაქო ინფრასტრუქტურისა და კეთილმოწყობის სამმართველოს დაკვეთით მოამზადა. სპეციალისტები მიიჩნევენ, რომ 19 შენობის აღდგენა-გამაგრება სასურველი არ იქნება და მოსახლეობის დროული განსახლებაა აუცილებელი. 


დღის ამბები