19, აპრილი 2019 20:56:00
იყო თუ არა ნათია კაპანაძე თავისუფალი სიტყვის გარანტი? დღეს მრჩეველთა საბჭოს უმრავლესობამ მას უარი უთხრა. ბორდის 4-მა წევრმა ჩათვალა რომ ყოფილი დირექტორი პრიორიტეტებს სწორად ვერ საზღვრავდა, თანხებს არასწორად ანაწილდებდა და უფრო მეტიც, თანამშრომლებთან კომუნიკაცია არ ჰქონდა.
ეს ის ერთ-ერთი არგუმენტია მრჩეველთა საბჭოს წევრისგან, რომლის გამოც ნათია კაპანაძემ თანამდებობა დატოვა. გიგა ჩხარტიშვილი ირწმუნება, რომ ახლა უკვე ყოფილ დირექტორს მაუწყებლის თანამშრომლებთან არსებულ პრობლემებზე კომუნიკაცია არ ჰქონია. იხსნებეს, იმ გარემოებასაც, რომ კაპანაძე თანამშრომლებს ბორდის წევრებთან კომუნიკაციას უკრძალავდა. ჩხარტიშვილი ასევე, ირწმუნება, რომ ბოლო ორი წლის მანძილზე მაუწყებელში პრიორიტეტები არ სრულდებოდა, თანხები კი ბიუჯეტიდან არამიზნობრივად იხარჯებოდა.
გიგა ჩხარტიშვილმა ისაუბრა ინტერესთა კონფლიქტზეც. მან აღნიშნა, რომ 2017 წელს ნათია კაპანაძემ მის ყოფილ ბიზნესპარტნიორთან ხელშეკრულება დადო, რაც კონკრეტულ სტრატეგიულ დოკუმენტს ეხებოდა. მან ასევე, არასამართლიან ანაზღაურებაზეც გაამახვილა ყურადღება. ცალკეული გადაცემების დაფინანსება კი მისი თქმით, კითხვით ნიშნებს აჩენს.
ირაკლი დარცმელიძეც ირწმუნება, რომ სიტყვის თავისუფლება ამ ტელევიზიაში ნათი კაპანაძესთან არ ასოცირდება. ამბობს, რომ სწორედ მან დახურა რეიტინგული გადაცემები და პროფესიონალები სახლში გაუშვა. მრჩეველი ირწმუნება, რომ კაპანაძე ერთპიროვნულად გადაწყვეტილებებს ღებულობდა.
ნატა იმედაიშვილი ამტკიცებს, რომ პრობლემები, რომელიც ბოლო პერიოდში იყო და რომელზეც თანამშრომლები აქტიურად საუბრობდნენ არ გვარდებოდა. აღნიშნა, რომ მედია პლურალიზმი დამოუკიდებელი და კიდევ უფრო დაბალანსებული უნდა იყოს, ვიდრე აქამდე იყო.
დღეს გამართულ ბორდის სხდომაზე გიორგი ირემაძემ ყოფილი დირექტორის წარმატებებზეც ისაუბრა და აღნიშნა, რომ მიღწევები, რაც ნათია კაპანაძის მმართველობის პერიოდში ტელევიზიამ მოიპოვა მისი პრინციპულობის შედეგი იყო. დაასახელა რამდენიმე პრობლემური საკითხიც.
ბეჟან გობაძე ერთადერთი იყო, რომელიც ნათია კაპანაძის იმპიჩმენტის საკითხს არ დაეთანხმა და პროცესს უსამართლო უწოდა. მან განაცხადა, რომ ეს გადაწყვეტილება პოლიტიზირებულია.
ნათია კაპანაძეს მრჩეველთა საბჭოს 4 წევრმა გამოუცხადა უნდობლობა.