26, აპრილი 2019 20:40:00
რატომ არ შეიწყალა პრეზიდენტმა გიორგი მამალაძე? სასულიერო პირს არც ამჯერად გაუმართლა. სიაში მსჯავრდებული ისევ არ აღმოჩნდა. რა გარიგებაზე საუბრობენ დაკავებულის ოჯახის წევრები და უფლებადამცველები?
ია, ციანიდის საქმეში ბრალდებული გიორგი მამალაძის ოჯახი მასშტაბურ საპროტესტო აქციებს აანონსებს. თორნიკე მამალაძეს იმედი ჰქონდა, რომ სააღდგომოდ საპატრიარქო პრეზიდენტს მისი ძმის შეწყალების თხოვნით მიმართავდა, რადგან სასულიერო პირებმა ამაზე საჯაროდაც ისაუბრეს. თუმცა დეკანოზი აღდგომას ისევ საკანში შეხვდება. პროტესტის გამოსახატად, მამალაძის ოჯახი საპატრიარქოს შემდეგ, კიდევ ერთი კარვის გაშლას უკვე მთავრობის ადმინისტრაციასთან აპირებს.
ბრალდებულის ადვოკატის ინფორმაციით, გიორგი მამალაძეს დანაშაულის აღიარებას თხოვდნენ, პროცესში კი პროკურატურა და ძალოვანი უწყება იყო ჩართული, მათ შორის სასამართლოც. მიხეილ რამიშვილის თქმით, დეკანოზი სასულიერო პირების მხრიდან თავს მოტყუებულად თვლის.
გარიგებაზე, რომელზეც გიორგი მამალაძის ოჯახის წევრები და ადვოკატები საუბრობენ ამის შესახებ პატრიარქის ქორ ეპისკოპოს არ სმენია. მეუფე იაკობის თქმით, საპატრიარქო მამალაძის შეწყალებას მხოლოდ იმ შემთხვევაში მოითხოვდა თუ იგი ბრალს აღიარებდა.
ის, რომ პრეზიდენტმა გიორგი მამალაძე არ შეიწყალა ამ ფაქტს შეფასებები პოლიტიკურ წრეებშიც მოჰყვა. მაგალითად პოლიტიკურ ცენტრ გირჩში ამბობენ, რომ მოსახლეობის უდიდეს ნაწილს იმ ბრალის არ სჯერა, რაშიც დეკანოზს ადანაშაულებენ. „ევროპულ საქართველოში“ კი მიაჩნიათ, რომ პრეზიდენტს საერთოდ არ ესმის რა მოვალეობები და პასუხისმგებლობა გააჩნია. ოპონენტებს უპასუხეს მმართველ გუნდში. მამუკა მდინარაძეს მიაჩნია, რომ ამ საკითხზე პოლიტიკოსები შეფასებებისგან თავს უნდა იკავებდნენ, რადგან შეწყალება მხოლოდ პრეზიდენტის კომპეტენციაა.
საკითხზე დღეს საპატრიარქოში კომენტარი არ გააკეთეს. ოფიციალური განცხადება დეკანოზის შეწყალების თემაზე საპატრიარქომ თებერვალში გააკეთა, რომელშიც ნათქვამი იყო, რომ შეწყალების შუამდგომლობით მხოლოდ იმ შემთხვევაში მიმართავდნენ, თუ მსჯავრდებული ითხოვს შენდობას და აღიარებს თავის წილ დანაშაულს.