დგას თუ არა რუსთავი 2-ის საქმის უკან სახელმწიფო ? ტელეკომპანიის წინააღმდეგ დაწყებულ სასამართლო დავაში ოპოზიცია ხელისუფლების ინტერესებს ხედავს. მმართველი გუნდის წარმომადგენლები კი პროცესში მათ მონაწილეობას გამორიცხავენ.
რუსთავი 2-ის წინააღმდეგ დაწყებულ ახალ სასამართლო დავას დღეს იუსტიციის მინისტრი გამოეხმაურა. თეა წულუკიანის განცხადებით, რაც არ უნდა სამართლებრივი პრეტენზიები და არგუმენტები ჰქონდეს ტელეკომპანიის 9%-ის მფლობელ ნინო ნიჟარაძეს სხვა მესაკუთრეებთან, ვიდრე ევროსასამართლოს მიერ დადგენილი შეჩერების მექანიზმი ძალაშია, ტელეკომპანიის მენეჯმენტში, ვერანაირი ცვლილება საჯარო რეესტრით ვერ განხორციელდება.
რუსთავი 2-ის წინააღმდეგ დაწყებულ დავაში ხელისუფლების მონაწილეობა კიდევ ერთხელ უარყვეს მმართველ გუნდში. საპარლამენტო უმრავლესობის ლიდერი აცხადებს, რომ საქართველოში მედია და მათ შორის რუსთავი 2-ი თავისუფალია და საუბარი იმაზე, რომ თითქოს ხელისუფლება ტელეკომპანიის წართმევას აპირებს ნიკა გვარამიას ერთგვარი ტაქტიკაა, რათა საზოგადოება შეცდომაში შეიყვანოს.
ოპოზიცია კი დარწმუნებულია, რომ ხელისუფლებას მორიგი სამართლებრივი დავით რუსთავი 2-ის გაჩუმება სურს. დეპუტატებს ამის ერთ-ერთ მაგალითად ტელეკომპანიასთან დაკავშირებით ბიძინა ივანიშვილის განცხადებებიც მოჰყვათ და თვლიან, რომ ოლიგარქს 2020 წლის არჩევნებისთვის კრიტიკული მედიის სარედაქციო პოლიტიკის შეცვლა სურს. თვლიან, რომ ეს ნაბიჯი ქართულ ოცნებას ძვირად დაუჯდება.
რუსთავი 2-ის 9%-ის მფლობელი ნინო ნიჟარაძე გვარამიასგან, ასევე, სხვა მეწილეებისგან და გაყიდვების სახლისგან, დაგროვილი გადასახადების სახით 26 მილიონის ოდენობით კომპენსაციას ითხოვს. მაუწყებლის გენერალური დირექტორი აცხადებს, რომ ნიჟარაძის სარჩელი კომუნიკაციების მარეგულირებელი კომისიის და მისი ხელმძღვანელის კახა ბექაურის ინფორმაციებზე დაყრდნობით არის მომზადებული, რაც იმას ნიშნავს, რომ ამ სარჩელის უკან ხელისუფლება დგას. დღესვე ცნობილი ხდება, რომ ნიჟარაძის მხარე მზად არის დათანხმდეს გვარამიას შეთავაზევას და სარჩელი არბიტრაჟში განიხილონ, იქნება ეს საქართველოში თუ მის ფარგლებს გარეთ.
9
s
s
s