პროსტიტუციის ადგილი 49 ლარად და 90 თეთრად. გირჩის სკანდალური და უცნაური ინიციატივა. პოლიტიკურმა პარტიამ დღეს საროსკიპო გახსნა. რისი თქმა სცადა ქმედებით და კანონდარღვევით ოპოზიციურმა პარტიამ?
საროსკიპოს სახელწოდება პიონერი იქნება. პროსტიტუციისთვის გაკუთვნილი ფართი გირჩის მთაწმინდის მაჟორიტარობის კანდიდატმა ჰერმან საბომ საჯაროდ და დემონსტრაციულად გახსნა. წითელ საწოლთან ერთად, ოფისში სექს სათამაშოების ფართო არჩევანია, იქვეა პრეზერვატივები და სანთლები. კედელზე გაკრულია საბჭოთა სიმბოლიკაც - ნიშნად იმისა, რომ საქართველოში პროსტიტუცია საბჭოთა პერიოდიდან ისჯება. გირჩის ამ მორიგი სკანდალური ინიციატივის მიზანი კი სწორედ პროსტიტუციის ლეგალიზების მოთხოვნაა.
საროსკიპოს გახსნით გირჩის წევრებმა დღეს სისხლის სამართლის კოდექსის 254-ე მუხლი დაარღვიეს და 3-დან 6 წლამდე ვადით თავისუფლების აღკვეთა ემუქრებათ. კიდევ ერთი კანონდარღვევით გირჩი ხელისუფლებას არჩევანს სთავაზობს. ან დაიჭირონ მათი ყველა წევრი, ან ამ მუხლით დაკავებული ყველა პირი გაათავისუფლონ. ზურა ჯაფარიძე თვლის, რომ პროსტიტუციის სრული ლეგალიზება სექს-ინდუსტრიაში ჩართული ადამიანების ძალადობისგან დაცვის ერთადერთი გზაა.
გირჩმა დღეს საკუთარი ქმედებით კანონმდებლები დააფიქრა - ლეგალიზებული უნდა იყოს თუ არა პროსტიტუცია - ამ კითხვაზე პასუხის გაცემა ოპოზიციას გაუჭირდა. გიგა ბოკერია ამბობს, რომ ეს არ არის მარტივი დილემა, თუმცა მიიჩნევს, რომ არსებული რეალობა აუცილებლად შესაცვლელია.
მმართველ გუნდში კი ამბობენ, რომ პროსტიტუციის ლეგალიზებასთან დაკავშირებით გირჩის მოთხოვნა არაკონსტიტუციურია .
გირჩის მორიგ კანონდარღვევას ჯერ-ჯერობით რეაგირების გარეშე ტოვებს შინაგან საქმეთა სამინისტრო. უწყება საროსკიპოს გახსნასთან დაკავშირებით არც ჟურნალისტების კითხვებს პასუხობს. საროსკიპო პიონერი წყვილებს 24 საათის განმავლობაში მოემსახურება. ფასიანი სექსუალური მომსახურების მიღების მიზნით ფართობის დაქირავება აქ ყველას შეეძლება - ვინც საათში 49 ლარსა და 90 თეთრს გადაიხდის.
7
s
s
s