30, მაისი 2019 20:04:00
ომარ მახარაძის განცხადებით, ის ბინძური პროვოკაციის მსხვერპლია. პოლიციის შენობიდან გამოსვლისას მან მედიის წარმომადგენლებს უთხრა, რომ პროვოკაცია გარკვეული პერიოდის განმავლობაში მზადდებოდა. ,,მე ვფიქრობ, რომ არაფერი არ იკვეთება დანაშაულებრივი. დადგინდება ობიექტური ჭეშმარიტება. არის ადამიანთა გარკვეული ჯგუფი, რომლებსაც მიზანმიმართულად სურდათ მოეხდინათ ჩემი ოჯახის, ახლობლების მეგობრების დისკრედიტაცია.'' - ამბობს ლექტორი. ომარ მახარაძეს არ დაუკონკრეტებია, ვინ ცდილობს მის დისკრედიტაციას.
სექსუალურ შევიწროვებაში დადანაშაულებულმა ომარ მახარაძემ პოლიციას დღეს პირველი ჩვენება მისცა. მან ჯერ ბათუმის მეექვსე განყოფილებაში გამომძიებლის კითხვებს უპასუხა. შემდეგ კი კომენტარი მედიისთვისაც გააკეთა. ,,ქართული ოცნების“ მაღალჩინოსანი და ყოფილი ლექტორი ამტკიცებს, რომ მისი მისამართით პროვოკაცია სავარაუდოდ დიდხანს იგეგმებოდა.
ომარ მახარაძე მის მიმართ წაყენებულ ბრალდებას არ ეთანხმება და სტუდენტის სექსუალური შევიწროვების ფაქტს უარყოფს. როგორც ცნობილია მახარაძის სტუდენტმა რამდენიმე დღის წინ ლექტორთან მიმოწერის სქრინები გაასაჯაროვა და აღნიშნა, რომ ომარ მახარაძე მისგან ,,თამამი სელფების“ გაგზავნას ითხოვდა და თავადაც სურათებს უგზავნიდა.
ომარ მახარაძეს შოთა რუსთაველის სახელმწიფო უნივერსიტეტის ეთიკის კომისიის გადაწყვეტილებით შრომითი ხელშეკრულება გუშინ, შეუწყვიტეს. ბათუმის საკრებულოში მისი თანამდებობიდან გათავისუფლების და ფრაქციის დატოვების შესახებ კი ხვალინდელ სხდომაზე იმსჯელებენ. საქმეზე გამოძიება სისხლის სამართლის კოდექსის 139-ე მუხლის მეორე ნაწილით მიმდინარეობს, რაც სექსუალური ხასიათის სხვაგვარი ქმედების იძულებას გულისხმობს. ბრალის დამტკიცების შემთხვევაში ომარ მახარაძეს 3 დან 5 წლამდე თავისუფლების აღკვეთა ემუქრება.