30, მარტი 2017 20:37:00
ბათუმში მე-15 სკოლაში 28 მარტს ინციდენტში მონაწილე მშობელმა დღეს ჩვენთან განმარტება გააკეთა. თამარ ქოქოლაძე მის მიმართ გამოთქმულ ბრალდებას უარყოფს და ამბობს, რომ შემთხვევის დროს მისი მხრიდან ცემის ფაქტს ადგილი არ ჰქონია. მშობლის განცხადებით უკვე თვეებია მის შვილს პარალელური კლასელი ავიწროებდა და ფიზიკურ შეურაცხყოფას აყენებდა. მან ასევე აღნიშნა, რომ აღნიშნულის თაობაზე ინფორმირებული იყო როგორც კლასის დამრიგებელი, ასევე სკოლის დირექტორი, თუმცა ფაქტზე რეაგირება არ მომხდარა. ქოქოლაძის თქმით 28 მარტს ბავშვთან მხოლოდ დალაპარაკებას შეეცადა, როცა მოზარდმა მას სიტყვიერი შეურაცხყოფა მიაყენა და ხელითაც შეეხო. მშობელი ასევე ამტკიცებს, რომ მან ხელი თავდაცვის მიზნით აიქნია რასაც მანდატურიც შეესწრო. ქოქოლაძე ირწმუნება, რომ აღნიშნულის ამსახველი ვიდეო-მასალაც არსებობს. მომხდარ ფაქტთან დაკავშირებით დღეს კომენტარი არ გააკეთა სკოლის დირექტორმა. ნინო მოდებაძის თქმით იგი ხვალ ორივე მშობელთან გასაუბრებას გეგმავს. ინცინდენტში მონაწილე ბავშვის მშობელმა ჩვენს სატელეფონო ზარებს არც დღეს უპასუხა.მომხდარს უკვე სწავლობს სახალხო დამცველის აპარატი, ფაქტთან დაკავშირებით ძალადობის მუხლით გამოძიება დაწყებულია შინაგან საქმეთა სამინისტროშიც.