ოთხშაბათი 18, სექტემბერი 2019

რივიერას განაშენიანების რეგულირების გეგმის დამტკიცებაზე საქმის წარმოება იწყება

16, ივლისი 2019 21:09:00

მოქალაქეთა და მესამე სექტორის პროტესტის მიუხედავად „რივიერას'' განაშენიანების რეგულირების გეგმის დამტკიცებაზე საქმის წარმოება იწყება. გადაწყვეტილება დღეს საკრებულოს სხდომაზე დაპირისპირების და ხმაურის ფონზე მიიღეს. ქალაქის თვითმმართველობამ ბათუმელების  მოთხოვნები არ გაითვალისწინა.  ხატია გოგრაჭაძე დაესწრო საკრებულოს დღევანდელ  სხდომას 

საკრებულოს უმრავლესობამ, ასე ერთხმად, „რივიერას'' განაშენიანების რეგულირების გეგმის დამტკიცებაზე საქმის წარმოებას მხარი დაუჭირა. გადაწყვეტილებას წინ ხანგრძლივი პოლემიკა და სიტყვიერი დაპირისპირება უძღვოდა, რის გამოც თავჯდომარემ შესვენება გამოაცხადა.

მოქალაქეებმა, შესვენების შემდეგ უმრავლესობის დეპუტატებს სამუშაო მაგიდებთან ხელნაწერები დაახვედრეს. მათი გზავნილები ასეთი იყო:სწორად განსაზღვრეთ პოლიტიკა და ქალაქის საჭიროებები.

ბათუმელთა ნაწილს მიაჩნია, რომ პროექტს სამომავლო პერსპექტივა არ გააჩნია და მისი განხორციელება ქალაქს საფრთხეს შეუქმნის.

საიას აჭარის ფილიალის ხელმძღვანელს ბათუმის საკრებულოს გადაწყვეტილება არასწორად მიაჩნია, რადგან ტერიტორიის სტატუსი სადავოა, რომელსაც ამ ეტაპზე სასამართლო განიხილავს. ანა მდინარაძის თქმით, მსგავსი პროექტის განხორციელება სპეციალურად დაცულ ზონაში კანონმდებლობასთან თანხვედრაში არ მოდის.

დემოკრატიის სკოლის წარმომადგენელი, რომელიც განხილვას მოქალაქის სტატუსით ესწრებოდა, თვლის, რომ უმრავლესობის გადაწყვეტილება ბათუმელების ინტერესებს ეწინააღდეგება.

ოპოზიციამ კენჭისყრაში მონაწილეობა არ მიიღო. მირდატ ქამადაძემ, ლაშა კომახიძეს ჰკითხა რა კავშირი აქვს პროექტის განმახორციელებელ კომპანიასთან, რის გამოც ბათუმელების წინააღმდეგ მიდის.

წარმომადგენლობითი ორგანოს უმრავლესობა პროექტის მნიშვნელობის ახსნას შეეცადა. მიაჩნიათ, რომ ოპოზიციის პრეტენზიები უსაფუძვლოა და მათი მთავარი ინტერესი სხდომის ჩაშლა იყო.

ბათუმის მერიის ქალაქ განვითარებისა და ურბანული პოლიტიკის უფროსის მტკიცებით, თუკი საერთაშორისო გეოლოგიური ორგანიზაციები, რომლებიც ტერიტორიას სწავლობენ, უარყოფით დასკვნას დადებენ, პროექტი არ განხორციელდება.

ბათუმის მერი ფიქრობს, რომ პროექტის განხორციელების შედეგად ქალაქის ხედი არ დაიფარება და ჰორიზონტი სხვა მიმართულებით ღიაა. ლაშა კომახიძის თქმით, ეს ტერიტორია ქალაქისთვის ისეთივე ისტორიული ნაწილია, როგორც სხვა ნებისმიერი კუთხე.

მოქალაქეები ამბობენ, რომ პროექტის განხორციელებას არ დაუშვებენ და მშენებლობისთვის ხელის შესაშლელად, პროტესტის ყველა ფორმას მიმართავენ.

 


დღის ამბები