24, ივლისი 2019 17:14:00
ინციდენტი ქობულეთის მუნიციპალიტეტში. ინფორმირებული წყარო „TV 25“-ს უყვება, რომ კოხში, სოფლის ფესტივალის მიმდინარეობისას მერიისა და საკრებულოს თანამშრომლები ერთმანეთს ფიზიკურად დაუპირისპირდნენ. მხარეებს შორის დაპირისპირება რამდენიმე საათს გრძელდებოდა, პროცესში პოლიციელებიც ჩაერთნენ. კონფლიქტის მონაწილეები სამართალდამცველების მოთხოვნას არ ემორჩილებოდნენ, რა დროსაც სამი პირი ხულიგნობის ბრალდებით დააკავეს. ქობულეთის საკრებულოს დეპუტატი, რომელიც წყაროს მტკიცებით, ჩხუბში მონაწილეობდა აცხადებს, რომ დაპირისპირებაში საჯარო მოხელეები არ მონაწილეობდნენ. მალხაზ რომანაძის თქმით, უთანხმოება დეკორატიული ყვავილის დაკარგვამ გამოიწვია, რომელიც ტენდერში გამარჯვებულ კომპანიას ეკუთვნოდა.