01, აგვისტო 2019 17:20:00
"ნაციონალური მოძრაობის" წევრი გია აბულაძე, დღეს გონიოში იმყოფებოდა. მან ჟურნალისტებთან საუბრისას განაცხადა, რომ გონიოს პლაჟი, ტურისტული სეზონის მიუხედავად, მოუწესრიგებელია, იგი ასევე ხელისუფლებისგან ითხოვს პასუხს თუ რას სთავაზობს ვიზიტორებს აჭარის მთავრობა.
მისივე თქმით, კვარიათში სანაპიროს გამაგრებისთვის 58 მილიონი ლარი დაიხარჯა, რომელიც დღემდე არ არის დასრულებული. გონიოში კი, ფაქტობრივად, შვიდი წლის განმავლობაში არაფერი არ გაკეთებულა.
"აჭარის ტურიზმის დეპარტამენტი სარეკლამო ბუკლეტებში 7 მილიონამდე ლარს ხარჯავს, სადაც თვალსაჩინო ობიექტებია დატანილი, თუმცა, ამით ტურისტს ვატყუებთ, რადგან, როცა სტუმარი იმას ნახავს, რაც აქ დახვდება, იმედგაცრუებული წავა უკან. ჩვენ ასე ტურიზმს ვერ განვავითარებთ, რომელი ტურისტი ჩამოვა აქ, ან თუ ჩამოვა ერთხელ, ის მეორედ რატომ უნდა ჩამოვიდეს? ამით ხომ ჩვენ ვკარგავთ ტურისტებს“ - ამბობს გია აბულაძე
ოპოზიციის ბრალდებებს აჭარის მთავრობა არ გამოხმაურებია.