ოთხშაბათი 18, სექტემბერი 2019

ხულოს მერი: საბავშვო ბაღის გამგის ქმედებას მკაცრი რეაგირება მოჰყვება

30, აგვისტო 2019 13:59:00

ხულოს მუნიციპალიტეტის მერი პირობას დებს, რომ ღურტას საბავშვო ბაღის გამგის სკანდალურ განცხადებებს მკაცრი რეაგირება მოჰყვება. ვახტანგ ბერიძის თქმით, საბავშვო ბაღში დისციპლინარული მოკვლევა დაიწყო, პარალელურად კი საქმეს საგამოძიებო ორგანო სწავლობს. ბერიძე არ აკონკრეტებს დატოვებს თუ არა მედეა მამულაძე სკოლამდელ დაწესებულებას. მერი აღნიშნავს, რომ გამგის მხრიდან მსგავსი პათოსი და დამოკიდებულება თანამშრომლების მიმართ მისთვის მიუღებელია.

 

„როცა დასრულდება შესწავლა და გამოძიება მაშინ მიეცემა ამ ყველაფერს შეფასება. ჩემთვის მიუღებელია ასეთი ფაქტი. ჩვენ დროში არავინ არ არის პრივილეგირებული, ყველას მოეთხოვება სათანადო პასუხი“ - ამბობს ვახტანგ ბერიძე.

 

- ბატონო ვახტანგ ადგილობრივებმა გვითხრეს, რომ საბავშვო ბაღში კონფლიქტები წლებია თითქმის ყოველდღიურად ხდება, ამის შესახებ კი მერია იყო ინფორმირებული. რატომ არ მოახდინეთ დროული რეაგირება? ჩვენ სიუჟეტი გვქონდა ამ თემაზე მომზადებული 2017 წელს, სადაც ადგილობრივები პრობლემის შესახებ ღიად საუბრობდნენ...

- არ ვიცი მე ეს ფაქტი. მაშინ მერი არ ვიყავი. როგორც მაქვს ინფორმაცია ადრე გაათავისუფლეს ეს ქალი, თუმცა მოგვიანებით სასამართლოს გადაწყვეტილებით ისევ დაბრუნდა დაწესებულებაში.

- ბატონო ვახტანგ, მედეა მამულაძემ ცოტა ხნის წინ სოციალურ ქსელში დაწერა, რომ მას დაწესებულების დატოვების სურვილი აქვს, თუმცა ადგილობრივ ხელისუფლებას ალტერნატიულ ადგილს სთხოვს დასაქმებისთვის...

- ასე მარტივად არ ხდება სხვა სამსახურში გადასვლა. მან უნდა გაიაროს კონკურსი, ისე გამორიცხულია მისი სურვილი დაკმაყოფილდეს.


დღის ამბები