05, სექტემბერი 2019 21:45:00
სახურავის გარეშე დარჩენილი ათეულობით ოჯახი. გრიშაშვილის პირველ ჩიხში მდებარე კორპუსს ძლიერმა ქარმა სახურავი ჯერ კიდევ მაისში ახადა, თუმცა ბათუმის მერიას ფაქტზე რეაგირება ამ დრომდე არ მოუხდენია. უწყებაში ირწმუნებიან, რომ ტენდერში გამარჯვებული კომპანია მხოლოდ დღეს გამოვლინდა. ხატია გოგრაჭაძე არკვევდა დეტალებს.
გრიშაშვილის პირველ ჩიხში მცხოვრები, მაისის იმ ღამეს აღწერს, როდესაც ცხრა სართულიან კორპუსს ქარმა სახურავი ახადა. ეთერ დიასამიძის თქმით, მათი მრავალგზის მცდელობის მიუხედავად, მესამე თვეა, მერიის მხრიდან საკითხით არავინ დაინტერესებულა.
ადგილობრივების თქმით, სტიქიის დროს, წყალმა სადენებში შეაღწია, რის შედეგადაც რამდენიმე მათგანს საოჯახო ტექნიკა გაუფუჭდა. მათივე თქმით, ბინები მეექვსე სართულის ჩათვლით დაზიანდა. ნინო ფხაკაძე, რომელიც მცირეწლოვან შვილებთან ერთად ცხოვრობს, ამბობს რომ მის ბინაში არსებული საყოფაცხოვრებო ნივთები აღარ გამოდგება. მისი თქმით, მერიის წარმომადგენლები სტიქიის ღამეს ზარალის ანაზღაურებას შეჰპირდნენ, მაგრამ ამ დრომდე, უწყებიდან არავინ გამოხმაურებიათ.
დაზარალებულები ამბობენ, რომ გამოუვალი მდგომარეობის გამო, სოციალური ქსელით, ბათუმის მერს, ლაშა კომახიძესაც მიმართეს, თუმცა უშედეგოდ. უწყებიდან საქალაქო ინფრასტრუქტურისა და კეთილმოწყობის სამსახურში გადაგვამისამართეს, სადაც საკითხს ასე განმარტავენ.
ბათუმის მერიაში აცხადებენ, რომ ტენდერში გამარჯვებული კომპანია დღეს გამოვლინდა. დაახლოებით, 155 ათასი ლარის სამუშაოები, შპს „უნივერსალმა“ დეკემბრის ბოლომდე უნდა დაასრულოს.