23, სექტემბერი 2019 21:10:00
ახლა კი მოგიყვებით წულუკიძეების გასაჭირზე. ოჯახის ყოველდღიურობა ხელვაჩაურში სოფელ ზანაქიძეებში სტიქიურ ზონაში ცხოვრების რისკია. ტერიტორია ფერდსამაგრ სამუშაოებს საჭიროებს, თანხის ნაწილი კი უკიდურესად გაჭირვებულმა დედა-შვილმა საკრებულოს დადგენილების თანახმად საკუთარი ჯიბიდან უნდა გადაიხადოს. ოჯახს ამის ფინანსური შესაძლებლობა არ აქვს.
ეთერ წულუკიძე სპეციალური საჭიროების მქონე შვილთან ერთად, წლებია, მეწყერსაშიშ ზონაში ცხოვრობს. გეოლოგების დასკვნით ეს საცხოვრეპელი ტერიტორია, დაახლოებით 14 ათასი ლარის ღირებულების, ფერდსამაგრ და სხვა სამუშაოებს საჭიროებს. წულუკიძეების ოჯახი ხელვაჩაურის მუნიციპალიტეტის დაფინანსების, შესაბამის პროგრამაში მოხვდა, თუმცა მაღალი სარეიტინგო ქულის გამო, ოჯახს მთლიანი ღირებულების ათი პროცენტის გადახდა ევალება. ამბობენ, რომ დედა-შვილისთვის, რომელიც მუდმივად მედიკამენტებს საჭიროებენ, ერთადერთი შემოსავალი პენსიაა და ამ თანხის გადახდა მათ ფინანსებს აღემატება.
მეწყერმა, საცხოვრებელ სახლზე ასასვლელი კიბეც დაშალა და ახლა სახლის მეორე სართულს, ასე უკავშირდებიან. ჯაბა წულუკიძის თქმით, დახმარების თხოვნით, ხელვაჩაურის მერსაც მიმართა, თუმცა პასუხად ის მიიღო, რომ დახმარების მისაღებად, ავანსის სახით, გადახდის დამადასტურებელი საბანკო ქვითარი უნდა წარედგინა.
მეზობლები წულუკიძეების საცხოვრებელ პირობებს კარგად იცნობენ. მაშინ როცა, წინ ზამთარია და ოჯახს არანაირი შემოსავალი არ უფიქსირდება ხელისუფლების უმოქმედობა აკვირვებთ.
ხელვაჩაურის მერიაში გვითხრეს, რომ წულუკიძეების ოჯახს ათ პროცენტიანი ავანსის გადახდა, მუნიციპალიტეტის საკრებულოს 2017 წლის დადგენილებით განსაზღვრული ოთხი მუხლის 29 ქვეპუნქტიდან, მხოლოდ სარეიტინგო ქულების გამო დაუწესდა. ქმედითია თუ არა გასაჭირში მყოფი ოჯახებისთვის მსგავსი დადგენილებები? მერის მოადგილემ გვითხრა, რომ საკითხს, კიდევ ერთხელ, შეისწავლიან.
ხელვაჩაურის მუნიციპალიტეტის მერიას, მიმდინარე წელს, სტიქიური რისკის ზონაში არსებული საცხოვრებელი სახლების მიმართ ფერდსამაგრი ნაგებობების მშენებლობისთვის, 400 ათასი ლარი აქვს გამოყოფილი.