ადგილობრივი თვითმმართველობების თანამდებობის პირთა მიერ ქონებრივი დეკლარაციების ჯეროვნად შევსება კვლავ გამოწვევად რჩება.

„საერთაშორისო გამჭვირვალობა-საქართველომ”, თბილისის მიღმა, საქართველოს ყველა მუნიციპალიტეტის მერების, საკრებულოს თავმჯდომარეებისა და მათი მოადგილეების 300-ზე მეტი  ქონებრივი დეკლარაცია შეისწავლა.

მონიტორინგის შედეგად, 78 დეკლარაციაში 128 სხვადასხვა დარღვევა გამოვლინდა. მათ შორის: დეკლარაციის არასრულად შევსების 56 ფაქტი, კომპანიებში კუთვნილი წილის სხვა პირისთვის მინდობით გადაუცემლობის 56 შემთხვევა, თანამდებობასთან შეუთავსებელი საქმიანობის 16 ფაქტი. ამასთან, 5 თანამდებობის პირთან დაკავშირებული კომპანიები სახელმწიფო ტენდერებსა და გამარტივებულ შესყიდვებში მონაწილეობენ.

თანამდებობის პირთა ქონებრივი დეკლარაციების მონიტორინგის მიზანი ქონებრივ დეკლარაციებში ასახული ინფორმაციის გადამოწმება, პირთა უკანონო გამდიდრებისა და ინტერესთა კონფლიქტების პრევენცია, ასევე თანამდებობის პირთა ანგარიშვალდებულების ამაღლებაა.

შესაბამისად, წარმოგიდგენთ ინფორმაციას იმ პირთა შესახებ, რომლებიც:

• ფლობენ კომპანიებს, თუმცა ინფორმაცია დეკლარაციაში არ აქვთ ასახული;
• კუთვნილი  კომპანიები დეკლარირებული აქვთ, თუმცა საკუთარი წილები მართვის უფლებით სხვა პირისათვის არ აქვთ გადაცემული;
• ეწევიან თანამდებობასთან შეუთავსებელ საქმიანობას;
• საკუთარი ან ოჯახის წევრების კომპანიების მეშვეობით მონაწილეობენ სახელმწიფო ტენდერებში.

აჭარაში 20-ზე მეტი დეკლარაციიდან დარღვევები 6-ში გამოვლინდა, მათ შორის: დეკლარაციის არასრულად შევსების 3 ფაქტი და საკუთარი წილის სხვა პირისთვის გადაუცემლობის 3 შემთხვევა.

• დავით მჭედლიშვილი -  ქობულეთის საკრებულოს თავმჯდომარე

დავით მჭედლიშვილს 2019 წლის იანვარში შევსებულ დეკლარაციაში არ აქვს მითითებული, რომ მისი შვილი მიხეილ მჭედლიშვილი არის 100% მფლობელი და დირექტორი შემდეგ კომპანიებში: შპს „თმმ”, შპს „სიშელი”და შპს „ინგლისური აჭარაში - Adjara English”.

• ნათია თხილაიშვილი -ქობულეთის საკრებულოს თავმჯდომარის მოადგილე

ნათია თხილაიშვილს 2018 წლის სექტემბერში შევსებულ დეკლარაციაში არ აქვს აღნიშნული, რომ მეუღლე, მალხაზ მართალიშვილი 100% წილს ფლობს და დირექტორის პოზიცია უკავია შპს „პირამიდა-2012”-ში.

ქედის მუნიციპალიტეტი

• ლევან გორგილაძე -  ქედის მერი

ლევან გორგილაძეს 2019 წლის იანვარში დეკლარირებული აქვს, რომ იგი შპს „ლევგორის” 100% მფლობელია, თუმცა კანონის მოთხოვნის მიუხედავად, მას აღნიშნული წილი მართვის უფლებით სხვა პირისათვის არ აქვს გადაცემული.

• შუქრი თურმანიძე - ქედის საკრებულოს თავმჯდომარე

შუქრი თურმანიძეს 2018 წლის დეკემბერში დეკლარირებული აქვს, რომ შპს „ექსპრეს-გარანტის” 100% წილის მფლობელია, თუმცა კანონის მოთხოვნის მიუხედავად, მას აღნიშნულ წილი მართვის უფლებით სხვა პირისათვის არ აქვს გადაცემული.

შუახევის მუნიციპალიტეტი

• ფრიდონ ფუტკარაძე - შუახევის მერი

ფრიდონ ფუტკარაძეს 2019 წლის ივნისში დეკლარაციაში არ აქვს მითითებული, რომ მისი მეუღლე, ნესტან ფუტკარაძე ს შპს „ეკოტური Ge”-ს 50% წილის მფლობელია.

• ომარ ტაკიძე - შუახევის მერის პირველი მოადგილე

ომარ ტაკიძეს 2019 წლის იანვარში დეკლარირებული აქვს, რომ იგი შპს „ეკონომიის” 50% და შპს „აშენე და იმეგობრეს” 59% წილის მფლობელია, თუმცა კანონის მოთხოვნის მიუხედავად, მას აღნიშნულ წილები მართვის უფლებით სხვა პირისათვის არ აქვს გადაცემული.

Tags:

• დეკლარაციები
• ქონება
• საჯარო მოხელეები
• მუნიციპალიტეტები

გაზიარება

6