ახლა კი ნახავთ მოხუცის პორტრეტს, რომელიც 12 წელი ქალაქის სამსახურშია. გიჩვენებთ დაზმირ ძიძიგურის,- ბათუმის წყლის სტაჟიანი თანამშრომლის ყოველდღიურობას. იგი ქუჩაშია უხვი ნალექის, უამინდობის და დატბორვის დროს. 24 საათი მუშაობს იმისთვის რომ სანიაღვრე არხების სისუფთავესა და ჩვენს კომფორტულ გადაადგილებაზე იზრუნოს.
მთელი შეგნებული ცხოვრება ბათუმს ემსახურება. ამბობს, რომ თუ ადამიანს ჯანმრთელობა ხელს უწყობს და მუშაობის საშუალება აქვს სამსახური არასდროს უნდა დაეზაროს. დაზმირ ძიძიგური ,,ბათუმის წყლის“ ყველაზე სტაჟიანი თანამშრომელია. მადლიერებას შრომით გახარჯული წლებისთვის ყოველთვის გრძნობს, როცა დილით სამსახურის კარს შეაღებს.
წლების განმავლობაში ბათუმის ქუჩებში ტრამვაის დაატარებდა, როცა ტრანსპორტმა ფუნქციონირება შეწყვიტა, ,,ბათუმის წყალში“ დაიწყო მუშაობა. მართალია ხშირად დატბორვის გამო, ღამეები ქუჩაში გაუტარებია, მაგრამ სამსახურიდან წასვლაზე არასდროს უფიქრია. მიიჩნევს, რომ თუ ადამიანის დახმარება შეგიძლია, მხოლოდ საკუთარ კომფორტზე ზრუნვა არასწორია.
ახლა იგი თერთმეტკაციან ჯგუფს ხელმძღვანელობს. მკაცრი უფროსია, თუმცა შედეგის მისაღებად ყველაზე მეტს თვითონ მუშაობს, რათა თანამშრომლებისთვის მაგალითის მიმცემი გახდეს.
მისი გუნდის წევრები დაზმირ ძიძიგურს დადებითად ახასიათებენ. ამბობენ, რომ დისციპლინის და საქმისადმი მკაცრი მიდგომის გარდა მათი ხელმძღვანელი კარგი ადამიანობითაც გამოირჩევა.
დაზმირ ძიძიგური თავისი ჯგუფით ბათუმის ყველა ქუჩის სანიაღვრე არხის სისუფთავეზე მთელი კვირის განმავლობაში ზრუნავს.
1
s
s
s