21, ნოემბერი 2019 22:00:00
ბათუმში, ერთ-ერთ კერძო ბაღში, 2 წლის ბავშვი ჯგუფელმა დაკბინა. ამის შესახებ მშობელმა ფეისბუქის საკუთარ გვერდზე დაწერა, მოგვიანებით კი პოსტი წაშალა.
ამის შესახებ ინფორმაცია აჭარის საზოგადოებრივი მაუწყებელმა გაავრცელა.
ბაღის დირექტორი არ მალავს, რომ გოგონას ჯგუფელმა მართლაც უკბინა. ჰყვება, რომ პატარას ყინულის საფენები დაადეს და პირველადი დახმარება გაუწიეს. ლეილა აბაშიძე ირწმუნება, რომ ძიძას და მასწავლებელს საყვედური გამოუცხადა.
კერძო ბაღი, სადაც ამ ეტაპზე 54 ბავშვი სწავლობს, დაახლოებით ერთი თვის წინ გაიხსნა. ბაღში დამონტაჟებული არ არის კამერები.
ფოტო: არქივი