ვისაც ეს კადრები აქამდე არ გინახავთ, შეიძლება დაუჯერებლად მოგეჩვენოთ, თუმცა ამბავი ჩვენ დროში მოხდა და თქვენ წლის ყველაზე უჩვეულო ფაქტი გამოტოვეთ. ხემ ცურვა დაიწყო, ცხრა ზღვა გადაიარა და მოგზაურობა ბიძინა ივანიშვილის დენდროლოგიურ პარკში დაასრულა. გინესის წიგნში თუ არა, 2016 წლის ისტორიაში ამ მოვლენამ განსაკუთრებული ადგილი უკვე დაიკავა. ზღვაში მოტივტივე ხე ბევრისთვის შთაგონების წყაროდ იქცა.
2016 წელი ნამდვილი გამოცდა აღმოჩნდა ეროვნული ვალუტისთვის. ის გამუდმებით მერყეობდა. დოლართან მიმართებით გაუფასურდა, ისტორიულ მინიმუმს გადააჭარბა და ასე რეპუტაციაშელახული ეგებება 2017- ს.
საზოგადოების განსაკუთრებული ვნებათაღელვა მოჰყვა კულტურული მემკვიდრეობის ძეგლის ნგრევას. 2016 წელი ვაჟა ფშაველას 27-ში მდებარე და კიდევ რამდენიმე ფასეული შენობის ღირებული ისტორიის განადგურებით დაამახსოვრდება რეგიონს.
საზოგადოების ერთიანობისა და სამოქალაქო აქტივიზმის მაგალითი იყო ძველი ბულვარის დასაცავად გამართული აქციები. შედეგად, გადარჩა კულტურული მემკვიდრეობის ძეგლის მესამე ხეივანი.
უკვე ჩავლილ წელს უწყვეტ ფონად მიჰყვებოდა და სავარაუდოდ, არც მომავალ წელს იქნება უცხო ჩვენი რეგიონისთვის საპროტესტო აქციების სერიები - იპოთეკარების მოთხოვნები, ჰესების წინააღმდეგ გამოსვლები.
ყოველი გაწვიმებისას წყალში მცურავი ბათუმი, დიდთოვლობისას პარალიზებული ქალაქი, უხვი ნალექით გამოწვეული პრობლემები მაღალმთიანეთში, მეწყრული პროცესები - 2016 აქტიური სტიქიური მოვლენებითაც შემორჩება ჩვენს მეხსიერებას.
რეგიონში პოლიტიკური ტემპერატურაც საკმაოდ მაღალი იყო. უმაღლეს საბჭოში არაერთი ჩაშლილი სხდომა შემორჩა „მაცნეს“ არქივს და მოსახლეობის მეხსიერებას.
გადავაგორეთ ორი არჩევნები, შედეგად - სრულად გადახალისდა საკანონმდებლო ორგანოს შემადგენლობა. უმაღლესი საბჭოს არჩევნებზე კი სანახაობა არ მოგვკლებია. პატარძლები საარჩევნო ყუთთან, ცეკვა საარჩევნო უბანზე - ამ მოვლენებთან ერთად, განსაკუთრებით გამორჩეული ერთი კურიოზული შემთხვევაც იყო - მანდარინი მარკირების წყაროდ იქცა.
2016 წელს რეგიონისთვის კიდევ ერთი მნიშვნელოვანი მოვლენა მთავრობის თავმჯდომარის ცვლილება იყო. ვადაზე ადრე თანამდებობა დატოვა არჩილ ხაბაძემ და პოსტი ზურაბ პატარაძეს გადააბარა, რომელმაც, თავის მხრივ, მინისტრთა კაბინეტი, ახალი სახეებით დააკომპლექტა.
ათი წლის შემდეგ, 2016 წელს შეიცვალა საკონსტიტუციო სასამართლოს თავმჯდომარეც. არაერთი ხმაურიანი განცხადებების შემდეგ, გიორგი პაპუაშვილი წავიდა და თავმჯდომარის სავარძელი ზაზა თავაძემ ჩაიბარა.
რეგიონის მცხოვრებლები ისტორიული ფაქტის მომსწრეც გავხდით. 31 წლის შემდეგ ბათუმში 6 მაისის პარკში არსებული ნურიგელის ტბა მოიყინა. წყაროების თანახმად ფაქტი სულ 4-ჯერ დაფიქსირდა - 1911, 1928, 1949 და 1985 წლებში.
ემოციებით დატვირთული იყო მიმდინარე წელი სპორტის მოყვარულებისთვისაც. რიოში, საქართველოს დროშა 7-ჯერ აღიმართა. კვარცხლბეკზე, სხვადასხვა სიმაღლეზე ჩვენი ქვეყნის სპორტსმენები ამდენჯერვე იმყოფებოდნენ, მათ შორის ოლიმპიური მედალოსნები გახდნენ აჭარიდან ძალოსნები - შმაგი ბოლქვაძე და ირაკლი თურმანიძე.
მიმავალი წელი მნიშვნელოვანი აღმოჩნდა მელომანებისთვის. ზაფხულში რეგიონს პოპულარული ამერიკული როკ-ჯგუფი maroon 5 სტუმრობდა. გამორჩეული იყო წლევანდელი შავი ზღვის ჯაზ ფესტივალიც.
2016 რეგიონისთვის დაძაბული, თუმცა საინტერესო წელი იყო. ვიმედოვნებთ, რომ მომავალი წელი უკეთესი იქნება.