გაეროს ბავშვთა ფონდის (Unicef) განცხადებით, 2016 წელს სტატისტიკის ეროვნული სააგენტოს მიერ ჩატარებული საქართველოში ბავშვის შრომის ეროვნული კვლევის თანახმად, 5-17 წლამდე თითქმის 11,200 ბავშვი (ამ ასაკობრივი ჯგუფის 2%) არ დადის სკოლაში.
განათლების სამინისტროს, Unicef-ისა და ბულგარეთის მთავრობის პარტნიორობის შედეგად, საქართველოში სკოლის მიღმა დარჩენილი ყველაზე დაუცველი ბავშვებისა და მოზარდებისთვის ხარისხიანი განათლება ხელმისაწვდომი გახდება და სკოლის მიღმა დარჩენილ ბავშვებს ხარისხიან განათლების მიღების შესაძლებლობა მიეცემათ.
Unicef-ის განცხადებით, დღესდღეობით საქართველოში მწირია განათლების მეორე შანსის პროგრამები, რომლებიც მისცემს შესაძლებლობას სკოლის მიღმა დარჩენილ ბავშვებს და მოზარდებს დაუბრუნდნენ ფორმალური განათლების სისტემას, ჩაერთონ მოსწრების გასაუმჯობესებელ სავალდებული განათლებაში, გამოასწორონ სწავლის შედგები და შეძლონ სკოლიდან შრომის ბაზარზე გადასვლა.
"სისტემის ნაკლოვანებები, როგორიცაა არასაკმარისად განვითარებული მასწავლებლის ტრენინგის სისტემა, რომელიც უზრუნველყოფდა მოსწავლეზე ორიენტირებული სწავლების უნარებით აღჭურვილ მასწავლებლების მომზადებას, საჯარო დღის ცენტრებში მომვლელთა არასათანადო კვალიფიკაცია, არასაკმარისი სწავლისა და სწავლების რესურსები მოსწავლეების აკადემიური ჩამორჩენის გასაუმჯობესებლად, ასევე ფორმალურ კურიკულუმებში გაძლიერებული სასწავლო პროგრამების ნაკლებობა, რაც დაეხმარებოდა მოსწავლეებს ჩვეულებრივ სკოლაში წარმატებით ინტეგრირებაში კვლავ მთავარ პრობლემად რჩება", - წერია Unicef-ის მიერ გავრცელებულ ინფორმაციაში.
განათლების სამინისტროს ინფორმაციით, ამ თემასთან დაკავშირებით მხარეებს შორის შეხვედრა გაიმართა, სადაც პროექტზე იმსჯელეს. პროექტი მიზნად ისახავს სკოლის მიღმა დარჩენილი ბავშვების განათლების სისტემაში წარმატებულ ინტეგრირებას, ასევე, მოზარდების ისეთი უნარებითა და ცოდნით აღჭურვას, რომელიც შრომის ბაზრის მოთხოვნებს პასუხობს;
პროექტის ფარგებლებში შეირჩა 15 საპილოტე სკოლა და 6 დღის ცენტრი, სადაც, ბულგარეთის გამოცდილებაზე დაყრდნობით, საუკეთესო პრაქტიკას გააზიარებენ და დანერგავენ. დაგეგმილია მასწავლებლების, დირექტორებისა და დღის ცენტრების პერსონალის გადამზადება, რათა სახელმწიფომ სათანადოდ უზრუნველყოს სკოლის მიღმა დარჩენილი ბავშვებისთვის ხარისხიანი განათლების ხელმისაწვდომობა.