05, მაისი 2017 20:03:00
შესაძლოა აჭარის ტურიზმისა და კურორტების დეპარტამენტის მომავალი წლის ბიუჯეტი 1 116 200 ლარით გაიზარდოს. 2018 წლის პროგრამულ ბიუჯეტში ტურიზმის განვითარების ხელშემწყობი ღონისძიებებისთვის ჯამში 8 441 800 ლარია გათვალისწინებული. პირველადი პროექტის საჯარო განხილვა დეპარტამენტში დღეს გაიმართა. უწყება საშუალოვადიანი პრიორიტეტების ფარგლებში 2018-2021 წლებში 3 პროგრამის განხორციელებას გეგმავს. მათ შორისაა აჭარაში შიდა და უცხოელი ტურისტების მოზიდვისთვის სარეკლამო და პიარკამპანიები, რომლისთვისაც 6 მილიონი ლარი დაიხარჯება. რაც შეეხება სერვისებს, დეპარტამენტი ამ კუთხით მომავალ წელს 195 000 ლარს დახარჯავს. მაღალმთიან აჭარაში ტურიზმის ხელშეწყობის მიზნით კი 517 000 ლარია გათვალისწინებული. ბიუჯეტის პირველადი პროექტის განხილვას დღეს არასამთავრობო ორგანიზაციებიც ესწრებოდნენ.