გამოშვებას ექსკლუზიური ინფორმაციით ვხსნით, რომელიც ამ წუთებში ხდება ცნობილი. წყარო გვიყვება, რომ პატრულ-ინსპექტორის დაჭრაში ბრალდებული ქობულეთის მუნიციპალიტეტის სოფელ ლეღვას მკვიდრია. მას ჯანმრთელობის პრობლემები აწუხებს და იგი ოჯახში მკურნალობის კურსს გადიოდა. წყაროს თქმით, მას პატრულის თანამშრომელთან წარსულშიც ჰქონდა უთანხმოება. დაჭრაში ბრალდებულთან ერთად, გუშინ მისი ძმაც დააკავეს. ეს უკანასკნელიძმის შეკავებას ცდილობდა, რომელიც სახლიდან იყო გამოქცეული. აღსანიშნავია ისიც, რომ დაკავებულების ინტერესებს ამ დრომდე არავინ იცავს, წყაროს მიერ მოწოდებული ინფორმაციით, ბრალდებულების დაცვაზე ადვოკატები უარს აცხადებენ. შინაგან საქმეთა სამინისტროში განაცხადეს, რომ პოლიციელის დაჭრაში ბრალდებულის ძმა წვრილმანი ხულიგნობისა და დაუმორჩილებლობის ბრალდებით დააკავეს.
ოთარ თავართქილაძის ჯანმრთელობის მდგომარეობა ამ ეტაპზე სტაბილურია. მას ჭრილობა კისრის არეში მიაყენეს. დაზიანებები ვენებსა და ხორხის ზედაპირზე აქვს. ბათუმის რესპუბლიკურ საავადმყოფოში გადაყვანის შემდეგ, მას ოპერაცია ჩაუტარდა. პაციენტი პალატაში უკვე გადაიყვანეს, თუმცა იგი მართვის სუნთქვაზეა. საფრთხე კი იმისა, რომ მისი მდგომარეობა გართულდეს - მინიმალურია.
სათვალთვალო კამერების ჩანაწერებიდან ირკვევა, რომ საპატრულო პოლიციის ეკიპაჟი გამვლელმა შეაჩერა, რის შემდეგაც იგი სამართალდამცველს თავს დაესხა, შემდეგ კი გაქცევა სცადა. ბრალდებულის დაკავება მეწყვილემ ადგილზევე შეძლო.
თვითმხილველები შემზარავი ფაქტის დეტალებს იხსენებენ. ამბობენ, რომ უცნობმა პირმა სამართალდამცავს ჭრილობა ბლაგვი საგნით მიაყენა. ამ დრომდე უცნობია დანაშაულის ჩადენის მოტივი.
ფაქტზე გამოძიება სისხლის სამართლის კოდექსის 353-ე პრიმა მუხლით მიმდინარეობს, რაც პოლიციელზე, სპეციალური პენიტენციური სამსახურის მოსამსახურეზე ან ხელისუფლების სხვა წარმომადგენელზე ანდა საჯარო დაწესებულებაზე თავდასხმას გულისხმობს.
2
s
s
s