„საზოგადოებრივი მაუწყებლის აჭარის ტელევიზიისა და რადიოს“ დირექტორი უმაღლესი საბჭოს თავმჯდომარეს მრჩეველთა საბჭოს სრულ დაკომპლექტებას თხოვს. ნათია კაპანაძემ დავით გაბაიძეს ოფიციალური წერილით გუშინ მიმართა. მაუწყებლის დირექტორი აცხადებს, რომ მრჩეველთა საბჭოს არასრული შემადგენლობით მუშაობამ, შესაძლოა, ორგანიზაციაში რიგი შეფერხებები გამოიწვიოს. მათ შორისაა პრიორიტეტების დადგენა, ფინანსების ეფექტური მართვა, ტელევიზიისა და რადიოს ფუნქციონირებისთვის საჭირო მატერიალურ-ტექნიკური ბაზის შევსება და სხვა საკითხები. კაპანაძეს აჭარის უმაღლესი საბჭოს იურიდიული კომისიის თავმჯდომარე პასუხობს. ნინო ჩხეტიას განმარტებით, ამ ეტაპზე, იმ მოთხოვნების დასაკმაყოფილებლად, რაც მაუწყებლის წინაშე დგას და რაზეც ნათია კაპანაძე თავის წერილში საუბრობს, მრჩეველთა საბჭოს 4 წევრის მუშაობაც საკმარისი იქნება. საკანონმდებლო ორგანო საპასუხო წერილს ადრესატს ერთი კვირის ვადაში გადაუგზავნის. ამ დროისთვის „საზოგადოებრივი მაუწყებლის აჭარის ტელევიზიისა და რადიოს“ მრჩეველთა საბჭოს შემადგენლობაში მხოლოდ ოთხი წევრია. ბორდის თავმჯდომარე ზაზა ხალვაშმა პოსტი რამდენიმე თვის წინ დატოვა.
7
s
s
s