დროშების დღე დროშების გარეშე - მაცნეს გადამღები ჯგუფი დღეს, ქალაქის სხვადასხვა ქუჩაზე იმის გასარკვევად მოძრაობდა, აღმართეს თუ არა ეროვნულობის სიმბოლო. რა იწვევს მოქალაქეთა პასიურობას და რატომ არ თვლის ჰერალდიკის სახელმწიფო საბჭო მის მოვალეობად ეროვნული მოტივების ამაღლებას? ია გოლიაძისა და იო ჭანტურიას სიუჟეტიდან გაიგებთ.
ეს ბათუმია. სახელმწიფო დროშის დღესთან დაკავშირებით ქალაქში მცხოვრებლების განწყობებზე ეს კადრები მეტყველებს. რეალობა თითქმის ყველა ფანჯრის მიღმა იდენტურია. ჩვენ დღეს ქვეყნის მთავარი ეროვნული სიმბოლო ვერც ერთ საცხოვრებელ სახლზე შევნიშნეთ. სამაგიეროდ აივნებზე ტანისამოსი და სარეცხია გაფენილი.
რატომ არ არის ქალაქში დროშის აღმართვის ტრადიცია და რასთან ასოცირდება ქვეყნის ისტორიის, წარსულის, სარწმუნოების სიმბოლო და სახელმწიფო ღონისძიებების მთავარი ატრიბუტი? კითხვაზე მოქალაქეების აზრები რამდენიმე ნაწილად გაიყო.
დროშის გაიგივებას მხოლოდ სახელმწიფო დაწესებულებებთან, პოლიტიკურ პარტიებთან, საპროტესტო აქციებთან ცუდ პრაქტიკას უწოდებენ მესამე სექტორში. „დემოკრატიის ინსტუტში“ მიიჩნევენ, რომ მოქალაქეების პასიურობა ხელისუფლების მიერ მოვლენების პოლიტიზირება იწვევს.
ჰერალდიკის სახელმწიფო საბჭოში მოქალაქეებს სახელწიფოებრიობის სიმბოლოს ფანჯრებიდან და აივნებიდან აღმართვისკენ მოუწოდებენ, თუმცა ორგანიზაციაში იმასაც ამბობენ, რომ საზოგადოებაში ეროვნულობის გაზრდა და ცნობიერების ამაღლება მათი ვალდებულება არ არის.
ისტორიკოსები იმ ცვლილებებზე საუბრობენ, რომელიც დროშამ სხვადასხვა მეფის დროს განიცადა. წითელი ჯვარი სახელმწიფო ღონისძიებების მთავარ ატრიბუტზე შუა საუკუნეებში გაჩნდა. 2004 წლის შემდეგ კი სახელმწიფო დროშად ხუთჯვრიანი დროშა გამოცხადდა.
საქართველოს პრეზიდენტმა სალომე ზურაბიშვილმა საზოგადოებას საქართველოს სახელმწიფო დროშის დღე გურიიდან მიულოცა. „ჩვენ ამ დროშის ღირსი არ ვიქნებით, თუ ვერ შევძლებთ გაერთიანებას და ვიქნებით ბანაკებად დაყოფილი“ - აღნიშნა ქვეყნის მთავარსარდალმა.
სახელმწიფო დროშის დღე საქართველოში წელს მეცხრედ აღინიშნა. თარიღი 2012 წლის 14 იანვარს დაწესდა - სიმბოლურად, ეს ის დღეა, როცასაქართველოს სახელმწიფო დროშის შესახებ საქართველოს ორგანული კანონი მიიღეს.
1
s
s
s