27, იანვარი 2020 21:10:00
ბათუმის ყოფილი მერი სავარაუდოდ, მომდევნო შვიდი წლის განმავლობაში ციხეში იქნება. მოსამართლე დავით მამისეიშვილმა ჩათვალა, რომ თანხის განზრახ გაფლანგვაში ბრალი გიორგი ერმაკოვს მიუძღვის. საქმე იაფი სახლის პროექტის განხორციელებას ეხება. პროკურატურა არ გამორიცხავს, რომ მოსამართლის გადაწყვეტილება სადაო გახადოს. უფრო მეტ დეტალს სიუჟეტიდან გაიგებთ.
ბათუმის ყოფილმა მერს 7 წლიანი პატიმრობა მიესაჯა. ასეთია ბათუმის საქალაქო სასამართლოს გადაწყვეტილება. რვა თვიანი განხილვების შემდეგ, მოსამართლე დავით მამისეიშვილმა დაადგინა, რომ „იაფი სახლის“, მოგვიანებით „ხელმისაწვდომ საცხოვრისად“ წოდებული პროექტის თანხების გაფლანგვაში გიორგი ერმაკოვის ბრალეულობა გამოიკვეთა. პატიმრობა მიესაჯა საფინანსო ეკონომიკური სამსახურის უფროსს ეგარსლან ლომაძესაც. რა ბედი ეწიათ ამავე საქმეში ბრალდებულ პირების თენგიზ პეტრიძეს, ბაგრატ მანველიძეს, ვლადიმერ ხინთიბიძეს, ბექა ხალვაშსა და არჩილ ვანაძეს?
შეკვეთილი განაჩენი - ასე აფასებს მოსამართლე დავით მამისეიშვილის მიერ მიღებულ გადაწყვეტილებას ბათუმის ყოფილი მერის, გიორგი ერმაკოვის ადვოკატი. ყოფილ მაღალჩინოსანს სასამართლომ შვიდი წლით თავისუფლების აღკვეთა მიუსაჯა. დაცვის მხარე აცხადებს, რომ ერმაკოვი პოლიტიკური პატიმარია. ოჯახი სახალხო დამცველთან ჩასვლას გეგმავს. ადვოკატი კი მოსამართლის წინააღმდეგ ბრძოლას აანონსებს.
პატიმრობა მიესაჯა საფინანსო ეკონომიკური სამსახურის უფროსს ეგარსლან ლომაძესაც. მას წინასწარ პატიმრ
ობის ვადასთან ერთად, ციხეში, ჯამში წელიწადნახევრის გატარება მოუწევს. იგი სასჯელს არა გაფლანგვისთვის, არამედ სამსახურეობრივი უფლებამოსილების ბოროტად გამოყენებისთვის მოიხდის. გადაიხდის ასევე ფულად ჯარიმას 20 000 ლარის ოდენობით.
ბრალდების გადაკვალიფიცირების შედეგად, სამსახურეობრივი გულგრილობისთვის და არა თანხების გაფლანგვისთვის, არასაპატიმრო სასჯელს, ოცი ათას ლარიან ჯარიმას გადაიხდიან ამავე საქმეში ბრალდებული და სექტემბერში გირაოს სანაცვლოდ გათავისუფლებული პირები: თენგიზ პეტრიძე, ბაგრატ მანველიძე, ვლადიმერ ხინთიბიძე და ბექა ხალვაში.
რაც შეეხება არჩილ ვანაძეს, რომელიც დაკავების მომენტში აჭარის ფინანსთა და ეკონომიკის მინისტრის მოადგილე იყო, სასამართლო დარბაზიდან, დღეს უპირობოდ იქნა გათავისუფლებული.
პროკურატურა არ გამორიცხავს, რომ მოსამართლის გადაწყვეტილება სადაო გახადოს. ეს მას შემდეგ გახდება ცნობილი, როცა ბრალდების მხარეს გადაწყვეტილება ჩაბარდება და დოკუმენტაციას გაეცნობა.
ბათუმის მერიის შვიდი მაღალჩინოსანი პროკურატურამ გასული წლის 30 მაისს დააკავა. ყოფილ მერს, გიორგი ერმაკოვს, მილიონ 370 ათასი ლარის გაფლანგვას ედავებოდნენ. ეს ის თანხაა, რომელიც ბიუჯეტიდან, ბათუმში, „იაფი სახლის“, მოგვიანებით „ხელმისაწვდომ საცხოვრისად“ წოდებული პროექტის განხორციელებას უნდა მოხმარებოდა.