უამინდობის შედეგად გამოწვეული პრობლემები მაღალმთიან აჭარაში. გზები სოფლებში გაუწმენდავია, მძიმე ტექნიკა კი იქ ჩნდება სადაც მედია მიდის. მოქალაქეები დახმარებას ითხოვენ, ხალხი უხვი ნალექით გამოწვეულ დისკომფორტზე საუბრობს, შესაბამის უწყებებში კი ამტკიცებენ, რომ სათანადოდ მუშაობენ.
დიდთოვლობამ პრობლემები შექმნა ხელვაჩაურის მუნიციპალიტეტშიც. სოფელ ახალშენში თოვლის საფარი დაბაში 30 სმ ხოლო მაღლობში 60 სანტიმეტრს აღწევს.
ახალშენში დიდთოვლობის შემდეგ გზა, რომ არ გაწმენდილა ეს კადრებიც მეტყველებს. მოქალაქეებს მოყინულ ზედაპირზე გავლა უჭირდათ. იმის გამო, რომ თოვლის საფარი 30 სანტიმეტრს აღემატებოდა, მიკროავტობუსის მძღოლები ვერ გადაადგილდებოდნენ.
სოფელში მცხოვრებლები გვიყვებიან, რომ დიდთოვლობის დროს მოსწავლეებს სკოლაში მისვლა გაუჭრდათ. სასწავლო პროცესი არ შეწყვეტილა, თუმცა სკოლაში დაბალი სწრებადობა იყო. ანალოგიური მდგომარეობა დაგხვდა საბავშვო ბაღებში. მშობლებმა პატარების სკოლამდელ დაწესებულებაში მიყვანა უგზოობის გამო, ვერ მოახერხეს.
დიდთოვლობის დროს სოფელს ელექტროენერგიაც შეფერხებით მიწოდებოდა. ადგილობრივებს ჩაბნელებულ სახლებში ყოფნა რამდენიმე საათის განმავლობაში უწევდათ.
ახალშენში არა, თუმცა მეზობელ სოფელში სპეცტექნიკა მას შემდეგ მივიდა, რაც TV 25-ის გადამღები ჯგუფი ადგილობრივთა პრობლემებით დაინტერესდა. აჭარის საავტომობილო გზების დეპარტამენტის ხელმძღვანელმა საჩვენებლად ზედა წინსვლაში ტრაქტორი მიიყვანა და იმის დარწმუნებას შეეცადა, რომ გზები ინტენსიურად იწმინდება.
TV 25-ს დღეს, აჭარის თითქმის ყველა მუნიციპალიტეტიდან უკავშირდებოდნენ, ადგილობრივთა მტკიცებით, საავტომობილო გზების დეპარტამენტი სათანადოდ არ მუშაობს. მათივე ინფორმაციით, შიდა სასოფლო გზები უმეტეს შემთხვევაში არ იწმინდება.
5
s
s
s