19, თებერვალი 2020 21:16:00
აჭარის ტელევიზიის ბორდი თანამშრომელთა ნაწილის წინააღმდეგ წავიდა და ხმა საშტატო ცვლილებების დამტკიცებას მისცა. ეს კი იმას ნიშნავს, რომ რამდენიმე ადამიანი თანამდებობას დატოვებს. მათ შორისაა, საინფორმაციო სამსახურის უფროსის მოადგილე მაია მერკვილაძე. თავად მედიასაშუალების დირექტორმა დღეს პირობა დადო, რომ ყველა მათგანს ალტერნატიულ პოზიციას შესთავაზებს და ხელშეკრულებებს გაუგრძელებს. რატომ დაუჭირა საკითხს მხარი მრჩეველთა საბჭოს 3 -მა წევრმა იმ ფონზე, როცა თანამშრომლთა დიდი ნაწილი თვლის, რომ დირექტორი ამ სვლით სარედაქციო ვექტორის შეცვლას ცდილობს? იყო თუ არა საშტატო ცვლილებების აუცილებლობა?
3 მომხრე, 2 წინააღმდეგი- აჭარის ტელევიზიის ბორდმა საშტატო ერთეულების შემცირების საკითხს მხარი დაუჭირა. გაუქმდა საინფორმაციო სამსახურის უფროსის მოადგილის - მაია მერკვილაძის შტატი, დირექტორის ორი მოადგილის გიორგი მურვანიძისა და ბესო დუმბაძის შტატები, რომლებიც შემოქმედებით მხარეზე იყვნენ პასუხისმგებლები, გაუქმდა ფინანსური სამსახურის უფროსის მოადგილის - მაია შაშიკაძის პოზიციაც.
ჟურნალისტების პროტესტის ნიშნად გაფიცვას აანონსებენ. ამბობენ, რომ მიზანი სარედაქციო ვექტორის შეცვლაა.
მრჩეველთა საბჭოს სხდომა ისეთივე დაპირისპირებებით დასრულდა, როგორც დაიწყო. დღის წესრიგის დამტკიცებამდე პროფკავშირების წევრები სიტყვით გამოსვლას ითხოვდნენ, მათ კი ამის საშუალებას არ აძლევდნენ.
განვითარებულ მოვლენებს და ჟურნალისტების პროტესტს მაუწყებლის დირექტორი ფსიქოლოგიურ ძალადობად აფასებს. გიორგი კოხრეიძე ამბობს, რომ ''მოსალოდნელ საფრთხეებზე'' საუბრით დაიღალა და კიდევ ერთხელ დაასაბუთა მისის პოზიცია, თუ რატომ იყო აუცილებელი ცვლილებები.
კითხვები დარჩათ სხდომაზე დამსწრე მესამე სექტორის წარმომადგენლებსაც. მათთვის გაუგებარი დარჩა, რატომ გახდა აუცილებელი საკადრო ცვლილებების განხორციელება დაჩქარებული წესით. ამბობენ, რომ ბორდის გადაწყვეტილება უარყოფითად აისახება მაუწყებლის და ჟურნალისტების სარედაქციო პოლიტიკაზე.
აჭარის საზოგადოებრივი მაუწყებლის ირგვლივ განვითარებულ მოვლენებზე განცხადება გააკეთა ომბუდსმენმაც. ნინო ლომჯარიამ აღნიშნა, რომ ვითარება საგანგაშოა, რამდენადაც, იკვეთება სარედაქციო დამოუკიდებლობაში ჩარევის მცდელობა.
მაუწყებლის დირექტროის ინიციატივით, დღეს მხარდაჭერილი საშტატო ცვლილებები ძალაში 24 თებერვლიდან შევა.