18, მაისი 2017 20:12:00
ბათუმში ლევან გელაძის ქუჩაზე მცხოვრებლები სარეაბილიტაციო სამუშაოების განხორციელებას ითხოვენ. მათი განცხადებით ქუჩაზე განსაკუთრებით გაუსაძლისი მდგომარეობა წვიმიან დღეებშია. ისინი უკმაყოფილებას აღნიშნული ქუჩის მიმდებარედ სპორტული კომპლექსის მშენებლობასთან დაკავშირებითაც გამოთქვამენ და აცხადებენ, რომ სამუშაოები სპეციალური დამცავი ღობის გარეშე მიმდინარეობს. როგორც ადგილობრივები ამბობენ, მერიას დახმარებისთვის არაერთხელ მიმართეს, თუმცა უშედეგოდ. მერიაში გაგვიმარტეს, რომ აღნიშნულ ტერიტორიაზე სპორტული კომპლექსის მშენებლობას საქართველოს სპორტისა და ახალგაზრდობის სამინისტრო ახორცილებს. მათივე თქმით, ჩატარებული დათვალიერების შედეგად ტერიტორიზე განსაკუთრებული დარღვევა არ დაფიქსირებულა. რაც შეეხება ქუჩის კეთილმოწყობას , უწყებაში აცხადებენ, რომ ის პროექტის დასრულების შემდეგ იგეგმება. სპორტისა და ახალგაზრდობის საქმეთა სამინისტროში კი დღეს ჩვენს სატელეფონო ზარებს არ უპასუხეს.