09, მარტი 2020 18:22:00
ბათუმში, ასლან აბაშიძის 49 ნომერში მცხოვრები 80-მდე ოჯახი სკვერის გაკეთებას ითხოვს. ადგილობრივების თქმით, ტერიტორიაზე კორპუსის ამხანაგობამ ბათუმის მერიის თანხმობით, საბავშვო ატრაქციონების დემონტაჟი გასულ წელს მოახდინა. რატომ დატოვა უწყებამ მოზარდები გასართობი სივრცის გარეშე? თეო ფუტკარაძის სიუჟეტიდან გაიგებთ.
8 წლის გიორგი მეგობრებთან ერთად სათამაშოდ ამ ეზოში ჩამოდის. მოზარდებს სხვა არჩევანი არც აქვთ. ხშირად, მათთვის დარიც და ავდარიც ერთნაირად მოსაწყენია. ეზოს რომელ მხარესაც არ უნდა გაიხედოთ, ინფრასტრუქტურა გაუმართავია, ამიტომ არც თუ იშვიათად, დედები გარეთ გასვლაზე უარს ეუბნებიან.
საბავშვო ატრაქციონი ეზოს გასულ წელს ამშვენებდა. იგი კორპუსის ამხანაგობამ ბათუმის მერიის თანხმობით, თუმცა საკუთარი სახსრებით დაამონტაჟა. მათთვის გაურკევეველი მიზეზით, მერიამ დემონტაჟი მალევე მოახდინა.
როგორც მერიაში გავარკვიეთ, ტერიტორია, სადაც საბავშვო ატრაქციონი იყო, აბაშიძის 49 ნომერში მდგარი კორპუსის ამხანაგობას არ ეკუთვნოდა და დემონტაჟიც ამიტომ მოახდინეს, თუმცა პასუხისმგებელ სამსახურს ნებართვის გაცემისას ეს გარემოება არ გადაუმოწმებია. იმის გამო, რომ კორპუსის მშენებლობისას დეველოპერს სკვერის მოსაწყობად ტერიტორია არ დაუტოვებია და არც მერიას წაუყენებია პირობა მშენებლობის ნებართვის გაცემისას, მოთხოვნის დაკმაყოფილება იმაზეა დამოკიდებული, გამოიძებნება თუ არა კორპუსის ირგვლივ თავისუფალი ფართი.
ბათუმის მერიაში ვერ აკონკრეტებენ, როდის დაიწყებენ კორპუსის ირგვლივ ტერიტორიის მოძიებას და რა ვადაში გაეცემა პასუხი მოსახლეობას.