27, მარტი 2020 17:59:00
მას შემდეგ, რაც ქვეყანაში საგანგებო მდგომარეობა გამოცხადდა, რეგიონში საკრებულოს პირველი სხდომა ხელვაჩაურის მუნიციპალიტეტში ჩატარდა. სხდომათა დარბაზის ნაცვლად წევრები მუნიციპალიტეტის კულტურის სახლი შეიკრიბნენ. სხდომას თითქმის ყველა დეპუტატი ესწრებოდა, გარდა ფრაქცია „ნაციონალური მოძრაობისა“. წევრების ნაწილი სხდომაზე პირბადეების გარეშე მივიდა. კენჭი სულ 3 საკითხს უყარეს.
ხელვაჩაურის საკრებულოს სხდომათა დარბაზიდან მუნიციპალიტეტის კულტურის სახლში. მას შემდეგ რაც ქვეყანაში საგანგებო მდგომარეობა გამოცხადდა და დროებითი შეზღუდვები დაწესდა, ხელვაჩაურის საკრებულომ ასეთი გამოსავალი იპოვა. ორმეტრიანი დისტანცია დაიცვა და სხდომა დახურულ სივრცეში ჩაატარა. საკრებულოს წევრების ნაწილი არც პირბადის გარეშე მისვლას მორიდებია.
დისტანციურად, ონლაინ სივრცის გამოყენებით შეკრება არც განუხილავთ. რატომ? პასუხი ვერ მივიღეთ. საკრებულოს წევრებს არც იმაზე უზრუნიათ, რომ დახურულ შენობაში, ერთ დარბაზში, ყველა წევრს თავი ერთდორულად არ მოეყარა.
სხდომაზე განსახილველად სამი საკითხი გამოიტანეს. მათგან ერთ-ერთი ბიუჯეტში ცვლილებებს შეეხებოდა. წარმომადგენლობითმა ორგანომ შეამცირა მივლინებებისთვის გაწერილი ხარჯები და მიმართა სარეზერვო ფონდში. სარეზერვო ფონდში გადაიტანა ტენდერების ეკონომიებისგან მიღებული 138 ათასი ლარიც. ამავე ეკონომიებიდან დარჩენილი კიდევ ოცი ათასი ლარი კი ვეტერანთა და შშმ პირთა მედიკამენტებით დახმარების პროგრამას დაამატა.
საკრებულომ მოისმინა 2019 წლის ბიუჯეტის წლიური შესრულების ანგარიში. კოლეგებმა კენჭი უყარეს მუნიციპალიტეტის მერიის საშტატო ნუსხისა და თანამდებობრივი სარგოების დადგენილებაში ცვლილებებს.