27, მარტი 2020 18:07:00
უმუშევრად დარჩენილი ოჯახები ხელვაჩაურში. ე.წ. „ოცნების ქალაქი“ რამდენიმე ათას ადამიანს ითვლის, რომელთა უმრავლესობაც აქ სწორედ სოციალური პრობლემების გამო დასახლდა. ქვეყანაში კორონავირუსის გავრცელებამ და საგანგებო ვითარების გამოცხადებამ მათი ყოველდღიურობა რადიკალურად შეცვალა. შეწყვეტილი სამუშაო პროცესების შედეგად, ადგილობრივები შემოსავლის გარეშე დარჩნენ. აქ მცხოვრებლების პრობლემები სალომე უსტალიშვილმა მოისმინა.
8 წლის წინ გაშენებულ ამ დასახლებაში სოციალური სიდუხჭირე კორონავირუსის პანდემიამდეც თვალშისაცემი იყო. თვითნებურად დასახლებული ამ ასობით ოჯახის ყოფა კი ახალი კორონავირუსის შემდეგ კიდევ უფრო აუტანელი გახდა. მათ ის ყოველდღიური სამუშაო დაკარგეს, რომლითაც ყოველი ახალი დღე გადაჰქონდათ.
სამსახურის და ლუკმა- პურის გარეშე დარჩენილი მოქალაქეები დახმარების თხოვნით ხელისუფლებას ყოველდღიურად მიმართავენ, თუმცა დახმარებისთვის ჯერ არავინ მისულა. „ოცნების ქალაქში“ ძირითადა შვილების საკვებით უზრუნველყოფას ითხოვენ.
„დარჩი სხლში“ - მოწოდების არსიც კარგად ესმით და მნიშვნელობაც, თუმცა ამბობენ, რომ არსებული შეზღუდვების ფონზე შიმშილი ელოდებათ.
ადგილობრივები სურსათის ვაუჩერების მოლოდინში არიან, თუმცა აიღებს თუ არა პასუხსიმგებლობას ამ ოჯახებზე ხელისუფლება, ან რა ფორმით, ჯერ არავინ საუბრობს.