02, აპრილი 2020 21:31:00
კორონავირუსის გავრცელების ფონზე მოქალაქეები პოლიტიკურ პარტიებს მიმართავენ. 3 თვით უარი თქვან საბიუჯეტო თანხებზე და დააფინანსონ ეპიდემიასთან ბრძოლა- ასეთია წერილის შინაარსი, რომელიც პეტიციის სახით ინტერნეტ სივრცეში უკვე გავრცელდა. თეო ფუტკარაძე არკვევდა, მოიპოვებს თუ არა ინიციატივა მხარდაჭერას და რას ფიქრობენ თავად პოლიტიკური სუბიექტების წარმომადგენლები?
ასეთია წერილის შინაარსი, რომელზეც ხელმოწერებს მოქალქეთა ნაწილი აგროვებს. პეტიცია იმ პოლიტიკური პარტიებისთვისაა განკუთვნილი, რომლებიც სახელმწიფო ბიუჯეტიდან ფინანსდებიან, ანუ პარტიებისთვის, რომლებიც პარლამენტშია წარმოდგენილი. მიზანი ერთი აქვს, თანხა კორონავირუსის წინააღმდეგ ბრძოლას მოხმარდეს. იდეის მიმართ, სხვადასხვა დამოკიდებულებები აღმოაჩნდათ ადრესატებს.
რა პოზიცია უნდა ჰქონდეთ მოქალაქეთა ინიციატივის მიმართ „პატრიოტთა ალიანსში“ - საერთო აზრზე პარტიაში ჯერ არ შეჯერებულან. ბათუმის წარმომადგენლობაში აცხადებენ, რომ თუ ცენტრალური ოფისი გადაწყვეტს, რომ თანხები უნდა დათმონ, გადაწყვეტილებას რეგიონშიც მიემხრობიან.
„რესპუბლიკური პარტია“ სახელმწიფო დოტაციაზე არ არის, თუმცა ინიციატივის შესახებ საკუთარი პოზიცია მაინც გამოხატა. ირაკლი ჩავლეიშვილი ფიქრობს, რომ ჯერ სახელმწიფომ უნდა აითვისოს პანდემიის ფონზე გამოთავისუფლებული სახსრები, სხვა პარტიებმა კი ნაბიჯები მხოლოდ ამის შემდეგ უნდა გადადგას.
რას ფიქრობენ მოქალაქეთა პეტიციაზე „ევროპულ საქართველოში“ - პარტიაში კომენტარი არ გააკეთეს. რაც შეეხება „ქართულ ოცნებას“, ცოტნე ანანიძის თქმით, ქვეყანაში შექმნილი მდგომარეობიდან გამომდინარე, პანდემიასთან გასამკლავებლად ყველამ უნდა გამონახოს გზა, თუმცა კონკრეტული ინიციატივის ბედი პარტიის წევრების გადასაწყვეტია.
განცხადება გააკეთა საპარლამენტო უმრავლესობის წევრმა, ირაკლი კობახიძემაც. მან აღნიშნა, რომ „ქართული ოცნების“ გუნდის წევრები, კორონავირუსთან ბრძოლის ფონდში, ხელფასის ნაწილს, მომდევნო სამი თვის განმავლობაში გადარიცხავენ.