06, აპრილი 2020 21:48:00
მაშინ, როცა ქვეყანა კორონავირუსის პანდემიით გამოწვეულ კრიზისს ებრძვის, ხულოს მერიამ თანამშრომლები ფინანსურად დააჯილდოვა. ხელფასზე 50%-იანი დანამატი მერიის 16 თანამშრომელს გასულ კვირას ჩაერიცხა. დღის განმვალობაში ხულოს მერიაში ფაქტურად დუმდნენ. ფაქტი პრეს-სამსახურში მხოლოდ დღის ბოლოს დაადასტურეს. დეტალურდ ჩვენს კითხვებს არ უპასუხეს, თუმცა თქვეს, რომ თანამშრომლებმა დამატებით მიღებული ფული ბიუჯეტს უკან დაუბრუნეს. ფაქტების დაზუსტებას მთელი დღის განმავლობაში ცდილობდა სულხან მესხიძე, თუმცა რის გარკვევა შეძლო, დეტალებზე თავად ისაუბრებს, რომელიც ახლა პირდაპირ ეთერში შემოგვიერთდება. სულხან, როგორც ვიცი, ბევრი კითხვა დაგრჩა პასუხგაუცემელი. და მაინც, რის გარკვევა შეძელი დისტანციურად?
TV 25-ს ექსკლუზიური ინფორმაცია ხულოს მერიიდან ერთ-ერთმა დასაქმებულმა მიაწოდა. სანდო წყაროს ცნობით, მუნიციპალიტეტის მერმა ფინანსურად 16-მდე თანამშრომელი დააჯილდოვა. მათ შორისაა უწყების მასმედიასა და საზოგადოებასთან ურთიერთობის განყოფილების უფროსი. ნური გორგაძე მთელი დღის განმავლობაში ჩვენს კითხვებს გაურბოდა და იმალებოდა. ეს ინფორმაცია თავდაპირველად TV25.GE-ზე გამოვაქვეყნეთ, რის შემდეგაც გორგაძემ წერილობითი პასუხი მოგვწერა, თუმცა გაურკვეველი რჩება ვინ მიიღო პრემია. გარდა ამისა, საპასუხო წერილში არც ისაა დაკონკრეტებული რამდენი დაუჯდა ბიუჯეტს თანამშრომლების პრემირება.
ხულოს მერიამ არც ის ინფორმაცია მოგვაწოდა ნამდვილად დააბრუნეს თუ არა თანამშრომლებმა თანხა ბიუჯეტში. სატელეფონო ზარებს არ უპასუხა ხულოს მერმა, ასევე, საკრებულოს თამჯდომარემ. სავარაუდოდ, მეტი დეტალი მას შემდეგ გვეცოდინება, როდესაც ოპოზიცია ხულოს მერიიდან გამოთხოვილ საჯარო ინფორმაციას მიიღებს. სწორედ ამ გზით შეეცდება ნაციონალური მოძრაობა გასაიდუმლოებული პრემირების ფაქტის გასაჯაროებას.
რის საფუძველზე მიიღეს საჯარო მოხელეებმა პრემია უცნობია - კიდევ ერთხელ შეგახსენებთ, რომ მუნიციპალიტეტში ყველა პასუხისმგებელმა პირმა დღეს ჩვენს სატელეფონო ზარებს არ უპასუხა. რა რეაგირება ექნება ფაქტზე რეგიონის პირველ პირს ამ ეტაპზე უცნობია. „TV 25“-ის მიერ გავრცელებულ ინფორმაციას თორნიკე რიჟვაძე არ გამოხმაურებია. მე აქვე გეტყვით, რომ გასულ კვირას თანამშრომლები ოზურგეთის მერმაც დააჯილდოვა, რასაც ქვეყნის პრემიერის კრიტიკა მოჰყვა. „მე მესმის, რომ ეს ხალხი დღეს წინა ხაზზე იმყოფება და კორონავირუსს ებრძვის, მაგრამ ეს მათი ვალდებულებაა. ისინი საჯარო მოხელეები არიან და ხალხს უნდა ემსახურონ და არა პრემიები აიღონ“, - განაცხადა გიორგი გახარიამ ფაქტის კომენტირებისას.