07, აპრილი 2020 17:55:00
ხულოს მერიის თანამშრომლებმა გასულ კვირას აღებული პრემია უკან გუშინ, "TV 25"-ის მასალის ეთერში გასვლის შემდეგ დააბრუნეს - ამის შესახებ მუნიციპალიტეტის მერიაში აცხადებენ, თუმცა პრესსამსახური თანხის უკან გადარიცხვის დამადასტურებელ დოკუმენტს ვერ გვაწვდის. ამბობენ, რომ დასაქმებულებმა პრემია ხაზინაში ინდივიდუალურად ჩარიცხეს, მაგრამ ქვითრები დაეკარგათ და სიტყვაზე უნდა ვენდოთ. „მაცნე“-ს დამატებით კითხვებს ნური გორგაძემ არ უპასუხა და ტელეფონი გათიშა. ხელფასზე 50%-იანი დანამატი ხულოს მერიამ 16 თანამშრომელს გასულ კვირას ჩაურიცხა. ფაქტს აჭარის მთავრობის თავმჯდომარე საზოგადოებრივი მაუწყებლის ეთერში გამოეხმაურა. „თუ ვინმეს გააზრებასთან მიმართებით გარკვეული პრობლემა აქვს, ვპირდები, აუცილებლად გაიაზრებენ და შეიგნებენ, რომ ამ მძიმე მდგომარეობაში დაუშვებელია ნებისმიერი პრემიისა და წახალისების შემთხვევები. იმის მიუხედავად, ვინ იქნება ეს, არჩევითი თუ დანიშვნითი თანამდებობის პირი“ - განაცხადა თორნიკე რიჟვაძემ.