15, აპრილი 2020 21:43:00
პანდემიის ფონზე, კორონავირუსის გავრცელების პრევენციის მიზნით, უწყებათაშორისი საკოორდინაციო საბჭოს რეკომენდაციით, ქუჩების მორეცხვა მიმდინარეობს. სამუშაოები უკვე რამდენიმე დღეა ქვეყნის მასშტაბით, სხვადასხვა ქალაქში ხორციელდება. მათ შორის ბათუმში. რამდენად ეფექტურია ღონისძიება კოვიდ 19-თან ბრძოლის წინააღმდეგ? ეკოლოგები, ექიმები და ოპოზიციის წარმომადგენლები ერთ პოზიციაზე ჯერდებიან- რომ სააავტომობილო გზის დეზინფექცია რეალური შედეგის მომტანი არ არის.
კორონავირუსის გავრცელების პრევენციის მიზნით, ბათუმის მერია ქალაქის ქუჩებს უკვე ორი კვირაა რეცხავს. როგორც დისტანციურად მოწოდებულ პრეს-რელიზებში თუ ვიდეო-კომენტარებში აღნიშნავენ, ქუჩები და ტროტუარები სპეციალური სადეზინფექციო ხსნარებით ირეცხება.
„მაცნე“ დაინტერესდა, რამდენად ეფექტურია ქუჩების რეცხვა პანდემიასთან საბრძოლველად და აქვს თუ არა რეალური შედეგი ღონისძიებებს. ექიმი, გელა გორგილაძე ამბობს, რომ მერია თანხას ამაოდ ხარჯავს, რადგან ქუჩების რეცხვა შედეგს ვერ მოიტანს. ექიმი ამბობს, რომ კორონავირუსი უსულო ზედაპირზე დიდანს ისედაც არ რჩება.
იგივეს ამტკიცებს ეკოლოგი კახა გუჩმანიძე. განმარტავს, რომ კოვიდ19ის გავრცელება ჰაერწვეთოვანი გზით ხდება, ამიტომ ხარჯი გამართლებული იქნებოდა, თუ კი ისეთ სადეზინფეცქიო ხსნარებს შეიძენდა, რომელსაც ადამიანებს დაურიგებდა, თუნდაც ხელების ხშირი გაწმენდისთვის.
„ნაციონალურ მოძრაობაში“ ამბობენ, რომ მერიის მთავარი მიზანი ამ შემთხვევაში არა კორონავირუსის გავრცელების პრევენცია, არამედ საზოგადოების თვალის ასახვევად, ერთგვარი პოპულისტური ნაბიჯია.
სპეციალობით ქიმიკოსი, რომელიც მსოფლიო ჯანდაცვის ორგანიზაციის მიერ სერტიფიცირებული ერთადერთი ახალგაზრდა სპეციალისტია საქართთველოში, აღნიშნავს, რომ ქუჩების სადეზინფექციო საშუალებებით მორეცხვის პრაქტიკას მსოფლიოს სხვადასხვა ქვეყნებში მიმართავენ, თუმცა რიგ ნიუანსებთან ერთად, სპეციალისტი იმ დეტალზეც საუბრობს, თუ რატომ არ ექნება ღონისძიებას შედეგი ბათუმში, ქალაქში, რომელიც განსაკუთრებული ტენიანობით გამოირჩევა.
ჩვენ ასევე დავინტერესდით, თუ რა შემადგებნლობისაა ხსნარი, რომელსაც მერია ქუჩების სადეზინფეცქიოდ იყენებს. მოვითხოვეთ შესყიდვის დამადასტურებელი დოკუმენტიც, თუმცა არც მერიაში და არც „ბათუმის სანდასუფთავების“ სამსახურში, ჩვენს შეკითხვებს არ უპასუხეს. დეტალებზე ინფორმირებული არც ბათუმის საკრებულოს უმრავლესობაში აღმოჩნდნენ.