ფაქტია, რომ კორონავირუსის პანდემიამ თითეული ჩვენგანის ცხოვრება შეცვალა. მოსახლეობის უმრავლესობა სამსახურისა და ყოველდღიური შემოსავლის გარეშე დარჩა. თუმცა ქვეყანაში არსებობს ადამიანები, რომლებიც დახმარების სურვილს გამოთქვამენ. ისინი დამოუკიდებლად ან სხვადასხვა პირთა დახმარებით იმ ოჯახებამდე აღწევენ, რომელთაც მათი მხარდაჭერა ამ რთულ ვითარებაში ყველაზე მეტად სჭირდებათ. ამ მხრივ, განსაკუთრებით გამოიკვეთა არასამთავრობო ორგანიზაციების როლი. მესამე სექტორის წარმომადგენლები შემოსავლის გარეშე დარჩენილ პირებს სხვადასხვა სახის საკვები პროდუქტით ამარაგებენ.
ნათელა დიასამიძე ერთ-ერთი მარტოხელა დედაა იმ მრავალ ოჯახს შორის, რომლის შემოსავალიც მხოლოდ სოციალური დახმარებაა. თანხას, რომელსაც სახელმწიფოსგან იღებს, ბინის ქირაში იხდის, საკვებისთვის კი თითქმის არაფერი რჩება. მარტოხელა დედას ორი შვილი ყავს. ვიდრე კორონავირუსი გავრცელდებოდა, ნათელა პერიოდულად სხვების ბინებს ალაგებდა და შვილებთან ერთად თავი ასე გაჰქონდა. შეკვეთა დიდი ხანია აღარ მიუღია, ამიტომ ოჯახის რჩენა კიდევ უფრო გაუჭირდა.
მისთვის ყველაზე კრიტიკულ მომენტში, გამოსავალი აღმოჩნდა დახმარება, რომელიც არასამთავრობო ორგანიზაცია ,,იალქანმა“ აღმოუჩინა. ორგანიზაციას ოჯახისთვის საკვები პერიოდულად მიაქვს.
ნათია არჯილაყვა კიდევ ერთი სოციალურად დაუცველი, სამი შვილის დედაა. სამსახური არც მას აქვს, ამიტომ ყოველთვიურ შემწეობას ისიც ქირაში ხარჯავს. ულუკმაპუროდ დარჩენილმა, სოციალურ ქსელით, შემთხვევით გაიგო ქველმოქმედების შესახებ და დახმარებისთვის მიმართა. მიღებული თანხით თითქმის მთელი თვის განმავლობაში გამოკვება შვილები.
ამგვარი ქველმოქმედების შედეგად, ნათია არჯილაყვასთან ერთად შიმშილს 43 ოჯახი გაუმკლავდა. მათ დასახმარებლად თანხა, ჯამში 9 000 ლარი, საზოგადოებრივი მაუწყებლის, აჭარის ტელევიზიის ჟურნალისტმა - თეონა თურმანიძემ შეაგროვა. სპეციალური პოსტი მან ფეისბუქ გვერდზე გამოაქვეყნა და ამ თანხის მობილიზება ათ დღეში შეძლო.
არასამთავრობო ორგანიზაცია ,,იალქანი’’ გასაჭირში მყოფ ოჯახებს სხვადსხვა ფორმით წლებია ეხმარება. აქ დახმარების ხელს უწვდიან მატაც, ვინც პანდემიის მიზეზით სამსახური დაკარგა. ხელმძღვანელი, თიკო აბაშიძე ამბობს, რომ მიმართვიანობა დიდია, დახმარების მსურველი კი ცოტა, ამიტომ ორგანიზაციის წევრები, საკვებ პროდუქტებს, ბენეფიციარებისთვის, ძირითადად თავიანთი სახსრებით ყიდულობენ. ბოლო ორ თვეში, თითქმის ერთი თვისთვის საკმარისი საკვები, 890-მდე ოჯახს მიუტანეს.
მოსახლეობის საკვებით უზრუნველყოფაზე აქტიურად მუსაობს ,,წითელი ჯვარიც“. გაზრდილი მოთხოვნის გამო, როგორც ორგანიზააცის ხელმძღვანელი აცხადებს, ცდილობენ დაეხმარონ მათ, ვისაც ეს ყველაზე მეტად სჭირდება.
მიუხედავად იმისა, რომ ბოლო ორი თვის განმავლობაში, არასამთავრობო თუ საქველმოქმედო ორგანიზაციებმა, ან უბრალოდ დახმარების მსურველებმა, შესაძლებლობის ფარგლებში, ასობით ოჯახი გადაარჩინეს შიმშილს, ყველა აღნიშნავს, რომ შემწეობას კიდევ ბევრი საჭიროებს, ამიტომაც მოუწოდებენ ადამიანებს, იყვნენ სოლიდარულები და გამოიჩინონ მეტი გულისხმიერება და დაეხმარონ ადამიანებს.
3
s
s
s